حضرت طلحہ سے روایت ہے کہ حضور صلی اللہ علیہ وآلہ وسلم نے ارشاد فرمایا کہ جب تم میں سے کوئی شخص نماز پڑھنا چاہے تو اپنے آگے کجاوے کی ٹیک کے برابر کوئی چیز رکھ لے پھر اگر اس کے آگے سے کوئی گذرے تو اس کی پرواہ نہ کرے۔ [مصنف ابن ابي شيبه/كتاب الصلوات/حدیث: 2872]

حضرت ابو ذر سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جب تم میں سے کوئی شخص نماز پڑھنے لگے تو اگر اس کے آگے کجاوے کی ٹیک کے برابر کوئی چیز ہو تو اس کا سترہ ہوجائے گا۔ [مصنف ابن ابي شيبه/كتاب الصلوات/حدیث: 2873]

حضرت ابن عمر رضی اللہ عنہما سے روایت ہے کہ نبی کریم صلی اللہ علیہ وآلہ وسلم عید کے دن اپنے آگے لوہے کا ایک جنگی آلہ گاڑ لیتے تھے اور اس کی طرف منہ کرکے نماز پڑھاتے تھے۔ [مصنف ابن ابي شيبه/كتاب الصلوات/حدیث: 2874]

حضرت ابو جحیفہ سے روایت ہے کہ نبی کریم صلی اللہ علیہ وآلہ وسلم نے چھوٹی لاٹھی یا اس جیسی کسی چیز کی طرف منہ کرکے نماز پڑھی جبکہ اس کے آگے راستہ تھا۔ [مصنف ابن ابي شيبه/كتاب الصلوات/حدیث: 2875]

حضرت مکحول فرماتے ہیں کہ ایک چھوٹا لوہے کا بنا جنگی ہتھیار نبی کریم صلی اللہ علیہ وآلہ وسلم کے ساتھ لے جایا جاتا تھا تاکہ اس کی طرف منہ کرکے نماز پڑھیں۔ [مصنف ابن ابي شيبه/كتاب الصلوات/حدیث: 2876]

حضرت اسود فرماتے ہیں کہ حضرت عمر ایک چھوٹی لاٹھی کوا پنے آگے گاڑ کر نماز پڑھتے اور گذرنے والے آپ کے آگے سے گذرتے رہتے تھے۔ [مصنف ابن ابي شيبه/كتاب الصلوات/حدیث: 2877]

حضرت ابوہریرہ فرماتے ہیں کہ نمازی کجاوے کی پچھلی لکڑی کے برابر اور کوڑے کی موٹائی میں کوئی چیز اپنے آگے رکھ لے تو اس کا سترہ ہوجائے گا۔ [مصنف ابن ابي شيبه/كتاب الصلوات/حدیث: 2878]

ایک صحابی روایت کرتے ہیں کہ حضور صلی اللہ علیہ وآلہ وسلم نے ارشاد فرمایا کہ اگر تمہارے اور تمہارے آگے سے گذرنے والوں کے درمیان کجاوے کی لکڑی کے برابر کوئی چیز ہو تو تمہارا سترہ ہوگیا۔ [مصنف ابن ابي شيبه/كتاب الصلوات/حدیث: 2879]

حضرت ابن عمر رضی اللہ عنہما سے روایت ہے کہ نبی کریم صلی اللہ علیہ وآلہ وسلم کے سامنے عید کے دن آگے لوہے کا ایک جنگی آلہ گاڑ دیا جاتا تھا اور اس کی طرف منہ کرکے آپ نماز پڑھاتے تھے۔ [مصنف ابن ابي شيبه/كتاب الصلوات/حدیث: 2880]

حضرت ابو کثیر فرماتے ہیں کہ میں نے حضرت انس بن مالک رضی اللہ عنہ کو دیکھا کہ وہ مسجد حرام میں اپنے آگے ایک لاٹھی گاڑ کر نماز ادا کررہے تھے۔ [مصنف ابن ابي شيبه/كتاب الصلوات/حدیث: 2881]