حضرت مغیرہ کہتے ہیں کہ حضرت ربیع بن خثیم کا معمول یہ تھا کہ جب کبھی گرمی زیادہ ہوجاتی تو اپنے گھر میں ایک نیزہ گاڑ کر اس کی طرف رخ کرکے نماز ادا کرتے۔ [مصنف ابن ابي شيبه/كتاب الصلوات/حدیث: 2882]

حضرت ابو العالیہ فرماتے ہیں کہ نمازی جھنڈے کے ڈنڈے سے بڑی چیز سے سترہ کرے گا۔ [مصنف ابن ابي شيبه/كتاب الصلوات/حدیث: 2883]

حضرت سعید بن جبیر فرماتے ہیں کہ جب تم کھلی جگہ نماز پڑھو تو اپنا کوڑا سامنے رکھ کر نماز پڑھو۔ [مصنف ابن ابي شيبه/كتاب الصلوات/حدیث: 2884]

حضرت ثابت بن قیس کہتے ہیں کہ میں نے حضرت نافع بن جبیر کو دیکھا کہ وہ سفر میں کوڑے یا لاٹھی کی طرف منہ کرکے نماز پڑھتے تھے۔ [مصنف ابن ابي شيبه/كتاب الصلوات/حدیث: 2885]

حضرت مکحول فرماتے ہیں کہ نمازی نماز میں کجاوے کی لکڑی کی طرف رخ کرکے نماز پڑھے گا۔ [مصنف ابن ابي شيبه/كتاب الصلوات/حدیث: 2886]

حضرت حسن اور حضرت قتادہ فرماتے ہیں کہ اگر نمازی کے آگے کجاوے کی لکڑی جیسی کوئی چیز ہو تو سترہ ہوگیا۔ [مصنف ابن ابي شيبه/كتاب الصلوات/حدیث: 2887]

حضرت حسن فرماتے ہیں کہ دریا سترہ ہے۔ [مصنف ابن ابي شيبه/كتاب الصلوات/حدیث: 2888]

حضرت ابراہیم فرماتے ہیں کہ اسلاف اس بات کو پسند کرتے تھے کہ جب کچھ لوگ کھلی جگہ نماز پڑھیں تو اپنے آگے کوئی چیز سترے کے لئے رکھ لیں۔ [مصنف ابن ابي شيبه/كتاب الصلوات/حدیث: 2889]

ایک صحابی روایت کرتے ہیں کہ رسول اللہ صلی اللہ علیہ وآلہ وسلم نے ارشاد فرمایا کہ جب تم میں سے کوئی نماز پڑھے تو اپنے آگے سترہ کے لئے کوئی چیز رکھ لے خواہ کوئی تیر ہی کیوں نہ ہو۔ [مصنف ابن ابي شيبه/كتاب الصلوات/حدیث: 2890]

حضرت یزید بن ابی عبید کہتے ہیں کہ حضرت سلمہ نے ایک صحرا میں کچھ پتھر اوپر نیچے رکھے اور جب وہ نماز پڑھنا چاہتے تو ان کی طرف رخ کرکے نماز ادا فرماتے۔ [مصنف ابن ابي شيبه/كتاب الصلوات/حدیث: 2891]