حضرت عطاء فرماتے ہیں کہ حضرت ابوہریرہ نے فرمایا کہ سورة الفاتحہ کافی ہے۔ میں بعد میں ان سے ملا اور میں نے پوچھا کیا فرض میں؟ انہوں نے کہا ہاں۔ [مصنف ابن ابي شيبه/كتاب الصلوات/حدیث: 3666]

حضرت ابراہیم فرماتے ہیں کہ فرض اور غیرفرض دونوں میں سورة الفاتحہ کافی ہے۔ [مصنف ابن ابي شيبه/كتاب الصلوات/حدیث: 3667]

حضرت ابو العالیہ براء کہتے ہیں کہ میں نے حضرت ابن عمر رضی اللہ عنہما سے کہا کہ کیا میں ہر رکعت میں قراءت کروں؟ انہوں نے فرمایا کہ مجھے اس گھر کے رب سے شرم آتی ہے کہ میں ہر رکعت میں سورة الفاتحہ اور اس کے بعد جو آسان لگے اس کی تلاوت نہ کروں۔ وہ کہتے ہیں کہ میں نے حضرت ابن عباس رضی اللہ عنہما سے سوال کیا تو انہوں نے فرمایا کہ وہ تمہاری مرضی ہے، چاہو تو اس سے کم تلاوت کرو اور چاہو تو اس سے زیادہ کرلو۔ [مصنف ابن ابي شيبه/كتاب الصلوات/حدیث: 3668]

حضرت ولید بن یحییٰ کہتے ہیں کہ حضرت جابر بن زید نے { مُدْہَامَّتَانِ } کہا اور رکوع کرلیا۔ [مصنف ابن ابي شيبه/كتاب الصلوات/حدیث: 3669]

حضرت ابو سعید خدری سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ اس شخص کی نماز نہیں ہوئی جس نے فرض اور غیر فرض میں سورة الفاتحہ اور اس کے ساتھ کوئی دوسری سورت نہ پڑھی۔ [مصنف ابن ابي شيبه/كتاب الصلوات/حدیث: 3670]

حضرت جابر فرماتے ہیں کہ ہم یہ بیان کیا کرتے تھے کہ جو شخص سورة الفاتحہ اور اس سے کچھ زیادہ نہ پڑھے اس کی نماز نہیں ہوتی۔ [مصنف ابن ابي شيبه/كتاب الصلوات/حدیث: 3671]

حضرت مجاہد فرماتے ہیں کہ نفل نماز میں سورة الفاتحہ کا پڑھنا کافی ہے۔ [مصنف ابن ابي شيبه/كتاب الصلوات/حدیث: 3672]