حضرت ابراہیم فرمایا کرتے تھے کہ اگر حائضہ آیت سجدہ کو سنے تو وہ سجدہ نہیں کرے گی، کیونکہ وہ سجدے سے زیادہ اہم چیز فرض نماز کو چھوڑ رہی ہے۔ [مصنف ابن ابي شيبه/باب سجود التلاوة/حدیث: 4374]

حضرت حماد کہتے ہیں کہ میں نے حضرت سعید بن جبیر اور حضرت ابراہیم سے سوال کیا کہ حائضہ اگر آیت سجدہ سنے تو سجدہ کرے گی یا نہیں؟ انہوں نے فرمایا کہ اس پر سجدۂ تلاوت لازم نہیں۔ نماز جو اسے معاف ہے ان سجدوں سے زیادہ اہم ہے۔ [مصنف ابن ابي شيبه/باب سجود التلاوة/حدیث: 4375]

حضرت ابن جریج کہتے ہیں کہ میں نے حضرت عطاء سے عرض کیا کہ اگر کوئی حائضہ عورت کچھ ایسے لوگوں کے پاس سے گذرے جو قرآن مجید کی تلاوت کررہے ہیں، اگر وہ لوگ سجدۂ تلاوت کریں تو کیا یہ ان کے ساتھ سجدہ کرے گی؟ انہوں نے فرمایا کہ نہیں، اسے ان سجدوں سے زیادہ بہترچیز فرض نماز سے بھی روک دیا گیا ہے۔ [مصنف ابن ابي شيبه/باب سجود التلاوة/حدیث: 4376]

حضرت ابو ضحی اور حضرت ابراہیم فرماتے ہیں کہ جب حائضہ عور ت سجدۂ تلاوت والی آیت سنے تو سجدہ نہیں کرے گی، وہ اس سے زیادہ ضروری چیز کو چھوڑ رہی ہے۔ [مصنف ابن ابي شيبه/باب سجود التلاوة/حدیث: 4377]

حضرت حسن فرماتے ہیں کہ اگر جنبی یا حائضہ آیتِ سجدہ سنیں تو سجدہ نہیں کریں گے۔ [مصنف ابن ابي شيبه/باب سجود التلاوة/حدیث: 4378]

حضرت عثمان فرماتے ہیں کہ اگر کوئی حائضہ آیتِ سجدہ سنے تو سر کو تھوڑا سا جھکا کر اشارہ کرلے۔ [مصنف ابن ابي شيبه/باب سجود التلاوة/حدیث: 4379]

حضرت ابن مسیب فرماتے ہیں کہ حائضہ عورت سر کو تھوڑا سا جھکا کر اشارہ کرلے اور کہے ”اے اللہ! میں تیرے لئے سجدہ کرتی ہوں“ [مصنف ابن ابي شيبه/باب سجود التلاوة/حدیث: 4380]