حضرت بکر بن عبد اللہ فرماتے ہیں کہ ایک مرتبہ ایک آدمی حضرت عمر کے پاس آیا اور اس نے عرض کیا کہ فلاں شخص نے ہمیں فجر کی نماز پڑھائی اور اس میں ایسی سورت پڑھی جس میں سجدہ تھا۔ حضرت عمر نے فرمایا کہ کیا اس نے واقعی ایسا کیا ہے؟ خبر دینے والے نے کہا ہاں۔ حضرت عمر نے اگلے دن فجر کی نماز پڑھائی اور اس میں سورة النحل اور سورة بنی اسرائیل کی تلاوت کی اور دونوں میں سجدہ کیا۔ [مصنف ابن ابي شيبه/باب سجود التلاوة/حدیث: 4455]

حضرت مسروق بن اجدع کہتے ہیں کہ میں نے حضرت عثمان کے ساتھ عشاء کی نماز پڑھی، اس میں انہوں نے سورة النجم کی تلاوت کی اور سجدہ کیا۔ دوسری رکعت میں سورة التین کی تلاوت فرمائی۔ [مصنف ابن ابي شيبه/باب سجود التلاوة/حدیث: 4456]

حضرت ابو رافع کہتے ہیں کہ حضرت عمر نے ہمیں عشاء کی نماز پڑھائی اور اس کی ایک رکعت میں سورۃ ا لانشقاق کی تلاوت کی، اس میں انہوں نے بھی سجدہ کیا اور ہم نے بھی۔ [مصنف ابن ابي شيبه/باب سجود التلاوة/حدیث: 4457]