حضرت نافع فرماتے ہیں کہ حضرت ابن عمر رضی اللہ عنہما صبح سویرے عید گاہ کی طرف روانہ ہوتے، بلند آواز سے تکبیر کہتے ہوئے امام کے پاس پہنچ جاتے۔ [مصنف ابن ابي شيبه/أول العيدين/حدیث: 5736]

حضرت محمد بن ابراہیم فرماتے ہیں کہ حضرت ابو قتادہ عید کے دن تکبیر کہا کرتے تھے اور اللہ کا ذکر کرتے تھے۔ [مصنف ابن ابي شيبه/أول العيدين/حدیث: 5737]

حضرت زہری فرماتے ہیں کہ نبی صلی اللہ علیہ وآلہ وسلم عید الفطر کے دن جب عید کے لئے نکلتے تو تکبیر کہتے تھے یہاں تک کہ عید گاہ میں پہنچ جائیں اور نماز مکمل کرلیں، نماز پڑھنے کے بعد تکبیر نہ کہتے تھے۔ [مصنف ابن ابي شيبه/أول العيدين/حدیث: 5738]

حضرت عطاء بن سائب کہتے ہیں کہ میں ابو عبد الرحمن اور ابن معقل کے ساتھ عید کے لئے گیا۔ ابو عبد الرحمن بلند آواز سے تکبیر کہتے تھے اور ابن معقل یہ کلمات کہتے تھے: اللہ کے سوا کوئی معبود نہیں، وہ اکیلا ہے اس کا کوئی شریک نہیں، بادشاہت اور تعریف اسی کی ہے اور وہ ہر چیز پر قادر ہے۔ [مصنف ابن ابي شيبه/أول العيدين/حدیث: 5739]

یزید بن ابی زیاد کہتے ہیں کہ میں حضرت سعید بن جبیر اور حضرت عبد الرحمن بن ابی لیلیٰ کے ساتھ گیا، وہ دونوں حضرات مسلسل تکبیر کہا کرتے تھے اور اپنے پاس سے گذرنے والوں کو بھی تکبیر کا حکم دیتے تھے۔ [مصنف ابن ابي شيبه/أول العيدين/حدیث: 5740]

حضرت اعمش کہتے ہیں کہ میں اپنے اساتذہ ابراہیم، خیثمہ اور ابو صالح کے ساتھ عید کی نماز کے لئے جاتا تھا، وہ تکبیر نہیں کہتے تھے۔ [مصنف ابن ابي شيبه/أول العيدين/حدیث: 5741]

حنش ابو معتمر فرماتے ہیں کہ حضرت علی رضی اللہ عنہ نے یوم الاضحی کو عید گاہ تک پہنچنے تک تکبیرات کہی ہیں۔ [مصنف ابن ابي شيبه/أول العيدين/حدیث: 5742]

حضرت عطاء فرماتے ہیں کہ یہ سنت ہے کہ آدمی عید کے دن تکبیرات کہے۔ [مصنف ابن ابي شيبه/أول العيدين/حدیث: 5743]

حضرت شعبہ کہتے ہیں کہ میں نے حضرت حماد اور حضرت حکم سے سوال کیا کہ کیا میں عید کے لئے نکلتے ہوئے تکبیر کہوں؟ دونوں نے فرمایا ہاں۔ [مصنف ابن ابي شيبه/أول العيدين/حدیث: 5744]

حضرت عروہ عید کے دن تکبیرات کہا کرتے تھے۔ [مصنف ابن ابي شيبه/أول العيدين/حدیث: 5745]