حضرت ابو عثمان فرماتے ہیں کہ حضرت بلال نے نبی صلی اللہ علیہ وآلہ وسلم سے عرض کیا کہ یا رسول اللہ! آپ ہم سے پہلے آمین نہ فرمائیں۔ [مصنف ابن ابي شيبه/كتاب صلاة التطوع والإمامة/حدیث: 8171]

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے فرمایا کہ جب قاری آمین کہے تو تم بھی آمین کہو، جس کی آمین فرشتوں کی آمین سے مل جائے تو اس کے گذشتہ گناہ معاف ہوجاتے ہیں۔ [مصنف ابن ابي شيبه/كتاب صلاة التطوع والإمامة/حدیث: 8172]

حضرت وائل فرماتے ہیں کہ میں نے نبی صلی اللہ علیہ وآلہ وسلم کے پیچھے نماز پڑھی، جب آپ نے { غَیْرِ الْمَغْضُوبِ عَلَیْہِمْ وَلاَ الضَّالِّینَ } کہا تو آمین بھی کہا۔ [مصنف ابن ابي شيبه/كتاب صلاة التطوع والإمامة/حدیث: 8173]

حضرت وائل بن حجر فرماتے ہیں کہ میں نے سنا کہ جب نبی صلی اللہ علیہ وآلہ وسلم نے { وَلاَ الضَّالِّینَ } پڑھا تو آمین کہا اور یہ کہتے ہوئے آواز کو لمبافرمایا۔ [مصنف ابن ابي شيبه/كتاب صلاة التطوع والإمامة/حدیث: 8174]

حضرت ابو میسرہ فرماتے ہیں کہ جب حضرت جبریل نے نبی صلی اللہ علیہ وآلہ وسلم کو سورة الفاتحہ پڑھائی اور جب انہوں نے { وَلاَ الضَّالِّینَ } کہا تو حضور صلی اللہ علیہ وآلہ وسلم سے فرمایا کہ آمین کہیں۔ چناچہ آپ نے آمین کہا۔ [مصنف ابن ابي شيبه/كتاب صلاة التطوع والإمامة/حدیث: 8175]

حضرت ولید بن رباح فرماتے ہیں کہ حضرت ابوہریرہ بحرین میں مؤذن تھے، انہوں نے وہاں امام سے فرمایا کہ مجھ سے پہلے آمین نہ کہا کرو۔ [مصنف ابن ابي شيبه/كتاب صلاة التطوع والإمامة/حدیث: 8176]

حضرت عکرمہ فرماتے ہیں کہ میں نے ایسے لوگوں کو دیکھا ہے کہ جب وہ امام کے { غَیْرِ الْمَغْضُوبِ عَلَیْہِمْ وَلاَ الضَّالِّینَ } کہنے پر آمین کہتے تو ایک گونج ہوا کرتی تھی۔ [مصنف ابن ابي شيبه/كتاب صلاة التطوع والإمامة/حدیث: 8177]

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ امام اس لئے بنایا جاتا ہے تاکہ اس کی اقتداء کی جائے، لہٰذا جب امام { غَیْرِ الْمَغْضُوبِ عَلَیْہِمْ وَلاَ الضَّالِّینَ } کہے تو تم آمین کہو۔ [مصنف ابن ابي شيبه/كتاب صلاة التطوع والإمامة/حدیث: 8178]

ایک اور سند سے یونہی منقول ہے۔ [مصنف ابن ابي شيبه/كتاب صلاة التطوع والإمامة/حدیث: 8179]

حضرت ابو یعلیٰ فرماتے ہیں کہ جب امام { غَیْرِ الْمَغْضُوبِ عَلَیْہِمْ وَلاَ الضَّالِّینَ } کہتا تو حضرت ربیع بن خثیم کہتے: اے اللہ! مجھے معاف فرمادے، آمین۔ [مصنف ابن ابي شيبه/كتاب صلاة التطوع والإمامة/حدیث: 8180]