حضرت صنابحی احمسی فرماتے ہیں کہ آنحضرت صلی اللہ علیہ وآلہ وسلم کی نظر زکوٰۃ کے اونٹوں میں سے ایک حسین اور خوبصورت اونٹ پر ٹھہری۔ آپ صلی اللہ علیہ وآلہ وسلم نے فرمایا یہ کیا ہے؟ زکوٰۃ وصول کرنے والے عرض کیا کہ میں نے دو چھوٹے اونٹ واپس کر کے یہ اونٹ لیا ہے تو آنحضرت صلی اللہ علیہ وآلہ وسلم نے ارشاد فرمایا پھر ٹھیک ہے۔ [مصنف ابن ابي شيبه/كتاب الزكاة/حدیث: 10178]

حضرت سوید بن غفلہ فرماتے ہیں کہ ہمارے حضور صلی اللہ علیہ وآلہ وسلم کا زکوٰۃ کی وصول یابی کے مقرر کردہ شخص آیا۔ میں اس کے پاس بیٹھا، وہ کہہ رہا تھا کہ بیشک میں نے دودھ پینے والا جانور وصول نہیں کیا، اور متفرق کو جمع نہیں کیا جائے گا اور جمع کو متفرق نہیں کیا جائیگا۔ فرماتے ہیں کہ ایک شخص بڑے والے کو ہان والا اونٹ لیکر آیا تو اس نے لینے سے انکار کردیا۔ [مصنف ابن ابي شيبه/كتاب الزكاة/حدیث: 10179]

حضرت ہشام بن عروہ اپنے والد سے روایت کرتے ہیں کہ حضور صلی اللہ علیہ وآلہ وسلم نے زکوٰۃ وصول کرنے والے کو بھیجا تو اسکو فرمایا کہ: لوگوں کے بہترین مال کو وصول نہ کرنا بلکہ ان کے بوڑھے اور عیب والے جانور وصول کرنا۔ [مصنف ابن ابي شيبه/كتاب الزكاة/حدیث: 10180]

حضرت قیس فرماتے ہیں کہ زکوٰۃ کے اونٹوں میں سے ایک خوبصورت اونٹ پہ آنحضرت صلی اللہ علیہ وآلہ وسلم کی نظر پڑی تو آپ نے فرمایا اس اونٹنی کا کیا معاملہ ہے؟ تو زکوٰۃ وصول کرنے والے نے عرض کیا کہ اے اللہ کے رسول! مجھے معلوم ہوا تھا کہ آپ کو سواری کی ضرورت ہے تو میں نے دو اونٹوں کے بدلے اسے لے لیا۔ [مصنف ابن ابي شيبه/كتاب الزكاة/حدیث: 10181]

حضرت قاسم سے مروی ہے کہ ایک مرتبہ حضرت عمر زکوٰۃ میں وصول شدہ بکریوں کے پاس سے گذرے تو آپ نے ایک دودھ پیتا بکری کا بچہ دیکھا، فرمایا یہ کیا ہے؟ لوگوں نے عرض کیا زکوٰۃ کی بکریاں ہیں، آپ نے ارشاد فرمایا: یہ نہیں دیا اس کے مالکوں نے اس حال میں کہ وہ خوش ہوں، لوگوں کو فتنہ میں مبتلا نہ کرو اور زکوٰۃ وصول کرتے وقت بہترین مال وصول نہ کیا کرو۔ اس کے کھانے سے دور رہو۔ [مصنف ابن ابي شيبه/كتاب الزكاة/حدیث: 10182]

حضرت معاذ سے مروی ہے کہ نبی کریم صلی اللہ علیہ وآلہ وسلم نے جب ان کو یمن بھیجا تو ارشاد فرمایا: (زکوٰۃ وصول کرتے وقت) لوگوں کے بہترین مال سے بچنا۔ [مصنف ابن ابي شيبه/كتاب الزكاة/حدیث: 10183]