حضرت ابراہیم سے مروی ہے کہ حضرت عبد اللہ کی اہلیہ نبی کریم صلی اللہ علیہ وآلہ وسلم کی خدمت میں آئیں اور عرض کی کہ میری پرورش میں میرا ایک بھتیجا ہے کیا میں اپنے زیورات کی زکوٰۃ اس کو دے سکتی ہوں؟ آپ صلی اللہ علیہ وآلہ وسلم نے فرمایا: ہاں۔ [مصنف ابن ابي شيبه/كتاب الزكاة/حدیث: 10830]

حضرت عبد اللہ بن عباس رضی اللہ عنہما فرماتے ہیں کہ وہ قرابت دار جو تمہارے عیال نہیں ہیں ان کو زکوٰۃ دینے میں کوئی حرج نہیں ہے۔ [مصنف ابن ابي شيبه/كتاب الزكاة/حدیث: 10831]

حضرت علقمہ سے مروی ہے کہ حضرت عبداللہ کی بیوی نے حضرت عبد اللہ سے دریافت فرمایا کہ میرے بھائی کا یتیم لڑکا میری پرورش میں ہے، کیا میں اس کو زکوٰۃ دے سکتی ہوں؟ آپ نے فرمایا: جی ہاں۔ [مصنف ابن ابي شيبه/كتاب الزكاة/حدیث: 10833]

حضرت ابراہیم بن ابو حفصہ فرماتے ہیں کہ میں نے حضرت سعید بن جبیر سے خالہ کے متعلق دریافت کیا کہ کیا ان کو زکوٰۃ دی جاسکتی ہے؟ حضرت سعید نے فرمایا: جب تک تم پر دروازہ بند نہ کردیا جائے۔ [مصنف ابن ابي شيبه/كتاب الزكاة/حدیث: 10834]

حضرت ابراہیم، حضرت ہشام اور حضرت حسن یہ سب حضرات قرابت داروں کو زکوٰۃ دینے کی اجازت دیتے ہیں۔ [مصنف ابن ابي شيبه/كتاب الزكاة/حدیث: 10835]

حضرت عبد الملک فرماتے ہیں کہ میں نے حضرت عطاء سے دریافت کیا: کیا آدمی اپنے قرابت داروں کو زکوٰۃ ادا کرسکتا ہے؟ آپ نے فرمایا ہاں جب کہ وہ تمہارے اہل خانہ میں سے نہ ہوں۔ [مصنف ابن ابي شيبه/كتاب الزكاة/حدیث: 10837]

حضرت ضحاک فرماتے ہیں کہ اگر تمہارے قرابت دار فقیر ہوں تو وہ دوسروں کی نسبت تمہاری زکوٰۃ کے زیادہ حق دار ہیں۔ [مصنف ابن ابي شيبه/كتاب الزكاة/حدیث: 10838]

حضرت زبیر فرماتے ہیں کہ میں نے حضرت ابراہیم سے بہن کو زکوٰۃ دینے کے متعلق دریافت کیا کہ کیا ان کو زکوٰۃ دی جاسکتی ہے؟ آپ نے فرمایا ہاں۔ [مصنف ابن ابي شيبه/كتاب الزكاة/حدیث: 10839]