حضرت مغیرہ بن شعبہ سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: بچے کی نماز جنازہ ادا کی جائے گی۔ [مصنف ابن ابي شيبه/كتاب الجنائز/حدیث: 11931]

حضرت نافع فرماتے ہیں کہ حضرت عبد اللہ بن عمر رضی اللہ عنہما نے جنین کی نماز جنازہ ادا فرمائی۔ حضرت نافع فرماتے ہیں کہ مجھے نہیں معلوم وہ (بوقت پیدائش) زندہ تھا کہ مردہ؟ [مصنف ابن ابي شيبه/كتاب الجنائز/حدیث: 11932]

حضرت ابی بکر فرماتے ہیں کہ جن کی نماز جنازہ ہم ادا کرتے ہیں ان میں سب سے زیادہ حق دار ہمارے بچے ہیں۔ [مصنف ابن ابي شيبه/كتاب الجنائز/حدیث: 11934]

حضرت سعید بن المسیب فرماتے ہیں جب بچے کی خلقت مکمل ہوجائے اور اس میں روح پھونک دی جائے تو اس کی نماز جنازہ ادا کی جائے گی۔ [مصنف ابن ابي شيبه/كتاب الجنائز/حدیث: 11935]

حضرت سعید فرماتے ہیں کہ حضرت ابوھریرہ نے نو زائیدہ بچے کی نماز جنازہ پڑھائی جس نے کوئی گناہ نہ کیا تھا، (اس میں دعا مانگتے ہوئے فرمایا) اے اللہ! اس کو عذاب قبر سے محفوظ فرما۔ [مصنف ابن ابي شيبه/كتاب الجنائز/حدیث: 11936]

حضرت ابن سیرین فرماتے ہیں کہ جب جنین کی خلقت مکمل ہوجائے تو اس کا نام بھی رکھا جائے گا اور اس کی نماز جنازہ ابھی ادا کی جائے گی جس طرح بڑے کی کرتے ہیں۔ [مصنف ابن ابي شيبه/كتاب الجنائز/حدیث: 11937]

حضرت مغیرہ بن شعبہ فرماتے ہیں کہ جنین کی نماز جنازہ ادا کی جائے گی، جس میں اس کے والدین کے لیے مغفرت کی دعا کریں گے۔ ایک راوی حضرت یونس فرماتے ہیں اھل زیاد نے اس کو مرفوعا نقل فرمایا ہے، لیکن میں نے اس کو اس طرح محفوظ نہیں کیا۔ [مصنف ابن ابي شيبه/كتاب الجنائز/حدیث: 11938]

حضرت عبد الرحمن بن ابی لیلیٰ فرماتے ہیں ہم نے اپنی اولاد میں سے کسی کو نماز جنازہ پڑھائے بغیر نہیں چھوڑا، (دفن نہیں کیا)۔ [مصنف ابن ابي شيبه/كتاب الجنائز/حدیث: 11940]