حضرت ابن عمر رضی اللہ عنہما فرماتے ہیں کہ میں نے نبی اکرم (صلی اللہ علیہ وآلہ وسلم) سے سنا، جو شخص بیت اللہ کا طواف کرے وہ کوئی قدم نہیں اٹھاتا اور رکھتا مگر اس کے واسطے ایک نیکی لکھ دی جاتی ہے اور ایک گناہ مٹا دیا جاتا ہے اور اس کے لیے جنت میں ایک درجہ بڑھا دیا جاتا ہے، اور فرماتے ہیں میں نے یہ فرماتے ہوئے بھی سنا: جو سات چکر پورے کرتا ہے اس کو غلام آزاد کے برابر ثواب ملتا ہے۔ [مصنف ابن ابي شيبه/كتاب الحج/حدیث: 13087]

حضرت محمد بن المنکدر اپنے والد سے روایت کرتے ہیں کہ نبی اکرم (صلی اللہ علیہ وآلہ وسلم) نے ارشاد فرمایا: جو شخص بیت اللہ کے طواف میں سات چکر اس طرح پورے کرے کہ اس میں کوئی غلط اور فضول حرکت نہ کرے اس کو اتنا ثواب ملتا ہے جتنا غلام آزاد کرنے والے کے لیے ہے۔ [مصنف ابن ابي شيبه/كتاب الحج/حدیث: 13088]

حضرت ابن عباس رضی اللہ عنہما فرماتے ہیں جو شخص بیت اللہ کے پچاس چکر (طواف) لگائے وہ گناہوں سے اس طرح پاک ہو کر نکلتا ہے جیسے اس کی والدہ نے اس کو آج ہی جنا ہو۔ [مصنف ابن ابي شيبه/كتاب الحج/حدیث: 13089]

حضرت عبد اللہ بن عمرو رضی اللہ عنہ فرماتے ہیں جو بیت اللہ کے سات چکر لگائے اور اس کے بعد دو رکعت نماز ادا کرے وہ اس طرح ہے جیسے اس کی والدہ نے اس کو آج ہی جنم دیا ہو۔ [مصنف ابن ابي شيبه/كتاب الحج/حدیث: 13090]

حضرت عبد اللہ بن عمرو رضی اللہ عنہ فرماتے ہیں جو بیت اللہ کا طواف کرے اس کے لیے غلام آزاد کرنے کے بقدر ثواب ہے۔ [مصنف ابن ابي شيبه/كتاب الحج/حدیث: 13091]

حضرت ابو سعید الخدری فرماتے ہیں میں بیت اللہ کا طواف کروں یہ مجھے اس بات سے زیادہ پسند ہے کہ میں طھمان کو آزاد کروں (طہمان حضرت ابو سعید الخدری کے غلام کا نام تھا)۔ [مصنف ابن ابي شيبه/كتاب الحج/حدیث: 13092]

حضرت ابو سعید سے ابو معاویہ کی حدیث کے مثل منقول ہے۔ [مصنف ابن ابي شيبه/كتاب الحج/حدیث: 13093]

حضرت مجاہد فرماتے ہیں کہ بیت اللہ کا طواف کرنا حج کے بعد عمرہ کرنے سے افضل ہے۔ [مصنف ابن ابي شيبه/كتاب الحج/حدیث: 13094]