حضرت اسلم جو حضرت عمر کے غلام ہیں فرماتے ہیں کہ حضرت عمر نے ذوالحلیفہ میں خوشبو سونگھی تو دریافت فرمایا یہ کس سے آرہی ہے؟ حضرت معاویہ نے عرض کیا مجھ سے، حضرت عمر نے فرمایا: میری عمر کی قسم کیا تجھ سے؟ حضرت معاویہ نے عرض کیا، اے امیر المؤمنین! میرے متعلق جلد بازی سے کام نہ لیں، بیشک حضرت ام حبیبہ نے مجھے خوشبو لگائی اور مجھے قسم دی ہے، حضرت عمر نے فرمایا، میں بھی تمہیں قسم دیتا ہوں کہ آپ ان کے پاس واپس جاؤ اور ان کو چاہئے کہ جس طرح انہوں نے آپ کو خوشبو لگائی ہے اسی طرح اس کو دھو دیں، حضرت معاویہ فرماتے ہیں کہ میں حضرت ام حبیبہ کی طرف لوٹا یہاں تک کہ راستہ میں ہی ان کے ساتھ مل گیا۔ [مصنف ابن ابي شيبه/كتاب الحج/حدیث: 14001]

حضرت عمر نے کپڑا منگوایا تو آپ کے پاس وہ کپڑا لایا گیا جس پر خوشبو لگی ہوئی تھی آپ نے اس کو واپس کردیا۔ [مصنف ابن ابي شيبه/كتاب الحج/حدیث: 14002]

حضرت ابراہیم نے ایک شخص کو احرام پہنتے ہوئے خوشبو لگاتے ہوئے دیکھا تو آپ نے اس کو مٹی کے ساتھ سر دھونے کا حکم فرمایا۔ [مصنف ابن ابي شيبه/كتاب الحج/حدیث: 14003]

حضرت عبد الرحمن فرماتے ہیں کہ میں نے ایک بار حج کا ارادہ کیا تو میں نے حضرت عبد الرحمن بن عمرو بن العاص کو پایا، جب احرام کا وقت آیا تو ہمیں کچھ خوشبو لگی ہوئی تھی، حضرت عبد الرحمن نے مجھ سے فرمایا: میرا خیال تھا کہ آپ اس طرح نہیں کرو گے، بیشک میں نے ایک بار حضرت عثمان بن ابو العاص کے ساتھ حج کیا اور مقام منجشانیہ جو بصرہ کے قریب ہے وہاں سے احرام باندھا، آپ نے ہمیں فرمایا: تم پر سفید مٹی کے اثرات ہیں اس لیے احرام باندھنے سے پہلے سروں کو دھو لو۔ [مصنف ابن ابي شيبه/كتاب الحج/حدیث: 14004]

حضرت محمد اس بات کو ناپسند کرتے تھے کہ کوئی شخص احرام باندھتے وقت خوشبو لگائے۔ [مصنف ابن ابي شيبه/كتاب الحج/حدیث: 14005]

حضرت حسن سے بھی اسی طرح مروی ہے۔ [مصنف ابن ابي شيبه/كتاب الحج/حدیث: 14006]

حضرت عطاء اس بات کو ناپسند کرتے تھے کہ کوئی شخص احرام باندھتے وقت خوشبو لگائے، اور فرماتے کہ اگر اس کو خوشبو لگی ہو تو اس کو چاہئے کہ اس کو دھو لے اور صاف کرلے۔ [مصنف ابن ابي شيبه/كتاب الحج/حدیث: 14007]

حضرت ابن عمر رضی اللہ عنہما جب احرام باندھنے کا ارادہ فرماتے تو پندرہ دن پہلے ہی کپڑوں کو دھونی دینا ترک کردیتے۔ [مصنف ابن ابي شيبه/كتاب الحج/حدیث: 14008]

حضرت سعید بن جبیر اس بات کو ناپسند فرماتے تھے کہ محرم احرام باندھتے وقت ایسی خوشبو سے دھونی دے جس میں مشک، افواہ اور زعفران ہو۔ [مصنف ابن ابي شيبه/كتاب الحج/حدیث: 14009]

حضرت سعید بن جبیر جب احرام باندھنے کا ارادہ کرتے تو خوشبو سے پرہیز کرتے۔ [مصنف ابن ابي شيبه/كتاب الحج/حدیث: 14010]