حضرت ام سلمہ فرماتی ہیں کہ جب ذی الحجہ کے دس دن شروع ہوجائیں تو نہ اپنے بال کاٹو اور نہ ہی ناخن۔ [مصنف ابن ابي شيبه/كتاب الحج/حدیث: 15418]

حضرت سعید بن المسیب فرماتے ہیں کہ جو شخص قربانی کرنے کا ارادہ رکھتا ہو تو جب ذی الحجہ کا مہینہ شروع ہوجائے تو اس کو چاہئے کہ وہ اپنے بال اور ناخن نہ کاٹے۔ [مصنف ابن ابي شيبه/كتاب الحج/حدیث: 15419]

حضرت سعید بن المسیب ناپسند فرماتے تھے کہ جو شخص حج کرنے کا ارادہ رکھتا ہو وہ بال کاٹے، راوی فرماتے ہیں کہ میں نے حضرت عکرمہ سے دریافت کیا؟ آپ نے فرمایا کہ کیا عورتوں کو بھی نہیں چھوڑا جائے گا؟!!۔ [مصنف ابن ابي شيبه/كتاب الحج/حدیث: 15420]

حضرت عطاء جب ایام حج قریب آجاتے تو بال کاٹنے کو ناپسند فرماتے تھے۔ [مصنف ابن ابي شيبه/كتاب الحج/حدیث: 15422]

حضرت ابن عمر رضی اللہ عنہما ارشاد فرماتے ہیں کہ جو شخص حج کرنے کا ارادہ رکھتا ہو اس کو چاہئے کہ وہ اپنے بال نہ کاٹے۔ [مصنف ابن ابي شيبه/كتاب الحج/حدیث: 15423]

حضرت عطاء سے دریافت کیا گیا کہ ایک شخص حج کا ارادہ رکھتا ہے تو کیا وہ اپنے بال کاٹ سکتا ہے؟ آپ نے فرمایا کہ اس میں کوئی حرج نہیں۔ [مصنف ابن ابي شيبه/كتاب الحج/حدیث: 15424]

حضرت سالم نصف شعبان کو اپنے بال کاٹ لیا کرتے تھے پھر وہ حج کے لیے نکلا کرتے تھے۔ [مصنف ابن ابي شيبه/كتاب الحج/حدیث: 15425]

حضرت حسن اس بات کو پسند فرماتے ہیں کہ آدمی ذی الحجہ کے دس دن بال اور ناخن نہ کاٹے، اور وہ بال صفا پورڈر استعمال کرنے میں کوئی حرج نہ سمجھتے تھے۔ [مصنف ابن ابي شيبه/كتاب الحج/حدیث: 15426]

حضرت جابر فرماتے ہیں کہ میں نے حضرت عکرمہ، حضرت سالم، حضرت عطاء، حضرت طاؤس اور حضرت قاسم سے اس کے متعلق دریافت کیا؟ سب حضرات نے فرمایا کہ اس میں کوئی حرج نہیں۔ [مصنف ابن ابي شيبه/كتاب الحج/حدیث: 15427]