حضرت مہاجر المکی فرماتے ہیں کہ ایک شخص نے حضرت جابر بن عبد اللہ رضی اللہ عنہ سے دریافت کیا کہ ہم میں سے کوئی شخص بیت اللہ کو دیکھے تو کیا وہ ہاتھوں کو بلند کرے گا؟ آپ نے فرمایا کہ یہ یہودیوں کا طریقہ ہے، ہم لوگوں نے نبی کریم صلی اللہ علیہ وآلہ وسلم کے ساتھ حج کیا ہم نے ایسا نہیں کیا تھا۔ [مصنف ابن ابي شيبه/كتاب الحج/حدیث: 16479]

حضرت جابر بن عبد اللہ رضی اللہ عنہ سے دریافت کیا گیا کہ کیا آدمی بیت اللہ کو دیکھنے کے وقت ہاتھوں کو بلند کرے گا؟ آپ نے فرمایا ہم لوگوں نے نبی کریم صلی اللہ علیہ وآلہ وسلم کے ساتھ حج کیا، ہم لوگوں نے ایسا کیا تھا۔ [مصنف ابن ابي شيبه/كتاب الحج/حدیث: 16480]

حضرت ابن عباس رضی اللہ عنہما ارشاد فرماتے ہیں کہ سات مقامات پر ہاتھ اٹھائے جائیں گے، تکبیر تحریمہ کہتے وقت، جب بیت اللہ پر نظر پڑے، صفا پر، مروہ پر، عرفات میں، مزدلفہ میں اور رمی کرتے وقت۔ [مصنف ابن ابي شيبه/كتاب الحج/حدیث: 16481]

حضرت ابن المنکدر فرماتے ہیں کہ حاجی کبھی بھی مفلس نہیں ہوتا۔ [مصنف ابن ابي شيبه/كتاب الحج/حدیث: 16482]

حضرت عبد اللہ کے اصحاب فرماتے ہیں کہ ہاتھوں کو آٹھ مقامات پر اٹھایا جائے گا، بیت اللہ پر نظر پڑے، صفا ومروہ پر، عرفات میں، مزدلفہ میں اور دو جمرات کی رمی کرتے وقت۔ [مصنف ابن ابي شيبه/كتاب الحج/حدیث: 16483]

حضرت ابراہیم اور حضرت خیثمہ فرماتے ہیں کہ ہاتھوں کو نماز میں، بیت اللہ پر نظر پڑے تب، صفا ومروہ اور مزدلفہ میں بلند کیا جائے گا۔ [مصنف ابن ابي شيبه/كتاب الحج/حدیث: 16484]

حضرت ابن عباس رضی اللہ عنہما ارشاد فرماتے ہیں کہ آٹھ جگہوں کے علاوہ ہاتھوں کو بلند نہیں کیا جائے گا، تکبیر تحریمہ میں، جب کسی شہر میں جاؤ تب، جب بیت اللہ پر نظر پڑے، جب صفا ومروہ پر کھڑے ہو، عرفات میں، مزدلفہ میں اور جمرات کی رمی کرتے وقت۔ [مصنف ابن ابي شيبه/كتاب الحج/حدیث: 16485]