حضرت جابر سے روایت ہے کہ حضرت ابو حمید، جناب نبی کریم صلی اللہ علیہ وآلہ وسلم کی خدمت میں کوئی مشروب لے کر حاضر ہوئے جبکہ آپ صلی اللہ علیہ وآلہ وسلم بقیع میں تھے۔ تو آپ صلی اللہ علیہ وآلہ وسلم نے فرمایا: ”تم نے اس کو ڈھانپ کیوں نہیں لیا۔ اگرچہ اس پر عرضاً لکڑی ہی رکھ دی جاتی۔“ [مصنف ابن ابي شيبه/كتاب الأشربة/حدیث: 25796]

حضرت جابر سے روایت ہے۔ وہ کہتے ہیں کہ جناب نبی کریم صلی اللہ علیہ وآلہ وسلم نے ارشاد فرمایا: ”اپنے دروازے بند کرلیا کرو۔ اور اپنے برتن ڈھانپ لیا کرو۔ اور اپنے مشکیزوں (کے منہ) کو باندھ لیا کرو۔“ [مصنف ابن ابي شيبه/كتاب الأشربة/حدیث: 25797]

حضرت ابو سعید خدری سے روایت ہے۔ وہ فرماتے ہیں کہ ہمیں حکم دیا جاتا تھا کہ ہم مشکیزوں کو باندھ لیں۔ [مصنف ابن ابي شيبه/كتاب الأشربة/حدیث: 25798]

حضرت ابو جعفر سے روایت ہے۔ وہ کہتے ہیں کہ جناب رسول اللہ صلی اللہ علیہ وآلہ وسلم کو ڈھانپا ہوا برتن پسند تھا۔ [مصنف ابن ابي شيبه/كتاب الأشربة/حدیث: 25799]

حضرت زاذان سے روایت ہے۔ وہ کہتے ہیں کہ جب برتن رات اس حالت میں پڑا رہے کہ وہ ڈھانپا نہ ہوا ہو تو شیطان اس میں تھوک دیتا ہے۔ پس میں نے یہ بات حضرت ابراہیم سے ذکر کی تو انہوں نے فرمایا۔ یا اس پانی میں سے شیطان پی لیتا ہے۔ [مصنف ابن ابي شيبه/كتاب الأشربة/حدیث: 25800]

حضرت ام سعید سے روایت ہے۔ وہ کہتی ہیں کہ میں حضرت علی رضی اللہ عنہ کی خدمت میں سحری لے کر حاضر ہوئی اور میں نے وہ سحری آپ کے سامنے رکھ دی۔ اور آپ تب نماز پڑھ رہے تھے۔ پھر جب آپ نماز پڑھ چکے تو فرمایا: تم نے اس کو ڈھانپ کیوں نہیں دیا۔ جب شیطان نے اس میں مُنہ مارا تو کیا تو نے دیکھا؟ اس کو گرا دو۔ آپ نے اس کو پینے سے انکار فرما دیا۔ [مصنف ابن ابي شيبه/كتاب الأشربة/حدیث: 25802]