حضرت عائشہ رضی اللہ عنہا سے روایت ہے۔ وہ کہتی ہیں کہ جناب نبی کریم صلی اللہ علیہ وآلہ وسلم میرے پاس تشریف لائے اور میں نے تصویروں والا ایک پردہ لٹکایا ہوا تھا۔ پس جب آپ صلی اللہ علیہ وآلہ وسلم نے اس کو دیکھا تو آپ صلی اللہ علیہ وآلہ وسلم کا رنگ مبارک متغیر ہوگیا۔ آپ صلی اللہ علیہ وآلہ وسلم نے اس کو اپنے ہاتھ سے پھاڑ دیا اور فرمایا: ”قیامت کے دن سب سے زیادہ سخت عذاب والے وہ لوگ ہوں گے جو اللہ تعالیٰ کی تخلیق کی مشابہت کرتے ہیں۔“ [مصنف ابن ابي شيبه/كتاب اللباس/حدیث: 26844]

حضرت عبد اللہ سے روایت ہے۔ وہ کہتے ہیں کہ جناب رسول اللہ صلی اللہ علیہ وآلہ وسلم نے ارشاد فرمایا: ”قیامت کے دن سب سے سخت عذاب والے تصویریں بنانے والے لوگ ہوں گے۔“ [مصنف ابن ابي شيبه/كتاب اللباس/حدیث: 26845]

حضرت ابن عمر رضی اللہ عنہما سے روایت ہے۔ وہ کہتے ہیں کہ جناب رسول اللہ صلی اللہ علیہ وآلہ وسلم نے ارشاد فرمایا: ”قیامت کے دن تصویریں بنانے والوں کو عذاب دیا جائے گا اور ان سے کہا جائے گا۔ جو تم نے پیدا کیا ہے اس کو زندہ کرو۔“ [مصنف ابن ابي شيبه/كتاب اللباس/حدیث: 26846]

حضرت ابو زرعہ سے روایت ہے۔ وہ کہتے ہیں کہ میں حضرت ابوہریرہ کے ساتھ مروان کے گھر میں گیا۔ پس انہوں نے گھر میں تصاویر دیکھیں تو فرمایا: میں نے جناب نبی کریم صلی اللہ علیہ وآلہ وسلم کو کہتے سُنا۔ ”اللہ تعالیٰ فرماتے ہیں۔ اس سے بڑھ کر ظالم کون ہوگا جو میری مخلوق کی طرح مخلوق بنانے چل پڑے؟ انہیں چاہیے کہ ایک دانہ پیدا کریں اور انہیں چاہیے کہ ایک ذرہ پیدا کریں۔ اور انہیں چاہیے کہ ایک جَو پیدا کریں۔“ راوی کہتے ہیں۔ پھر آپ نے وضو کا پانی منگوایا اور وضو فرمایا۔ [مصنف ابن ابي شيبه/كتاب اللباس/حدیث: 26847]

حضرت اسامہ سے روایت ہے۔ وہ کہتے ہیں کہ میں جناب نبی کریم صلی اللہ علیہ وآلہ وسلم کے ہمراہ بیت اللہ میں داخل ہوا۔ آپ صلی اللہ علیہ وآلہ وسلم نے بیت اللہ میں تصویر دیکھی تو آپ صلی اللہ علیہ وآلہ وسلم نے مجھے حکم دیا۔ پس میں آپ صلی اللہ علیہ وآلہ وسلم کے پاس پانی کا ڈول لے کر حاضر ہوا۔ اور آپ صلی اللہ علیہ وآلہ وسلم نے یہ پانی ان تصویروں پر مارنا شروع کیا۔ اور فرمایا: ’ ’ اللہ تعالیٰ اس کو قوم کو ہلاک کرے یہ ان کی تصویریں بناتی ہیں جس کو زندہ نہیں کرسکتی۔“ [مصنف ابن ابي شيبه/كتاب اللباس/حدیث: 26848]

حضرت نضر بن انس بن مالک رضی اللہ عنہ سے روایت ہے۔ وہ کہتے ہیں کہ میں حضرت ابن عباس رضی اللہ عنہما کے پاس بیٹھا ہوا تھا۔ اور وہ فتویٰ دے رہے تھے۔ (دلیل میں) یہ نہیں کہتے تھے۔ قال رسول اللّٰہ (صلی اللہ علیہ وآلہ وسلم) یہاں تک کہ ایک آدمی نے آپ سے سوال کیا: میں ایسا آدمی ہوں جو یہ تصاویر بناتا ہوں؟ تو حضرت ابن عباس رضی اللہ عنہما نے اس سے کہا۔ قریب ہو جاؤ۔ چناچہ وہ صاحب قریب ہوگئے۔ پھر حضرت ابن عباس رضی اللہ عنہما نے فرمایا: میں نے جناب نبی کریم صلی اللہ علیہ وآلہ وسلم کو کہتے سُنا ہے۔ ‘”جو شخص دنیا میں کوئی تصویر بنائے گا تو قیامت کے دن اس کو اس تصویر میں روح پھونکنے کا مکلف بنایا جائے گا اور وہ روح نہیں پھونک سکے گا۔“ [مصنف ابن ابي شيبه/كتاب اللباس/حدیث: 26849]

حضرت عکرمہ سے ارشاد خداوندی ان الذین یوذون اللّٰہ ورسولہ کے بارے میں روایت ہے کہتے ہیں کہ یہ تصویروں والے ہیں۔ [مصنف ابن ابي شيبه/كتاب اللباس/حدیث: 26850]