حضرت سعید بن مسیب فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: آدمی ہرگز مشورہ کرنے کے بعد ہلاک نہیں ہوگا۔ [مصنف ابن ابي شيبه/ كتاب الأدب/حدیث: 27955]

حضرت یحییٰ بن ابی کثیر فرماتے ہیں کہ حضرت سلیمان بن داؤد نے اپنے بیٹے کو فرمایا: اے میرے بیٹے! کسی معاملہ کو شروع مت کرنا یہاں تک کہ کسی رہنما سے مشورہ کرلینا، جب تم ایسا کرو گے تو کبھی اس معاملہ میں غمگین نہیں ہو گے۔ [مصنف ابن ابي شيبه/ كتاب الأدب/حدیث: 27956]

حضرت ضحاک فرماتے ہیں کہ اللہ رب العزت نے اپنے نبی کو مشورے کا حکم نہیں دیا مگر اس وجہ سے کہ اللہ اس کی فضیلت کو جانتے تھے۔ پھر آپ نے آیت تلاوت فرمائی۔ ترجمہ: اور آپ صلی اللہ علیہ وآلہ وسلم ان سے معاملہ کے بارے میں مشورہ کریں۔ [مصنف ابن ابي شيبه/ كتاب الأدب/حدیث: 27957]

حضرت اشعث فرماتے ہیں کہ امام شعبی نے ارشاد فرمایا: جب لوگ کسی چیز کے بارے میں اختلاف کریں تو تم دیکھو کہ اس معاملہ میں حضرت عمر نے کیا کیا۔ اس لیے کہ آپ کوئی کام نہیں کرتے تھے یہاں تک کہ اس کے بارے میں پوچھ لیتے اور مشورہ کرلیتے۔ [مصنف ابن ابي شيبه/ كتاب الأدب/حدیث: 27958]

حضرت ایاس بن دغفل فرماتے ہیں کہ حضرت حسن بصری نے ارشاد فرمایا: کہ کسی قوم نے باہم مشورہ نہیں کیا مگر یہ کہ ان کو اس مسئلہ کی بہترین صورت سجھا دی گئی۔ [مصنف ابن ابي شيبه/ كتاب الأدب/حدیث: 27959]