حضرت عامر فرماتے ہیں کہ حضرت ابن عمر رضی اللہ عنہما نے ارشاد فرمایا؛ کہ میں پروا نہیں کرتا کہ میں کسی سواری پر دس کا دسواں ہوں اس بات کے بعد کہ وہ ہمیں اٹھانے کی طاقت رکھتا ہو۔ [مصنف ابن ابي شيبه/ كتاب الأدب/حدیث: 28059]

حضرت عکرمہ فرماتے ہیں کہ نبی کریم صلی اللہ علیہ وآلہ وسلم کو بنو عبد المطلب کے دو لڑکے ملے تو آپ صلی اللہ علیہ وآلہ وسلم نے ان میں سے ایک کو اپنے آگے اور دوسرے کو پیچھے سوار کرلیا۔ [مصنف ابن ابي شيبه/ كتاب الأدب/حدیث: 28060]

حضرت ابن ابی ملیکہ فرماتے ہیں کہ حضرت عبد اللہ بن جعفر نے حضرت ابن زبیر سے فرمایا کہ کیا تمہیں یاد ہے کہ جب رسول اللہ صلی اللہ علیہ وآلہ وسلم مجھے، تمہیں اور ابن عباس رضی اللہ عنہما کو ملے تھے؟ آپ نے فرمایا: ہاں، تو آپ صلی اللہ علیہ وآلہ وسلم نے ہم دونوں کو سوار کرلیا تھا اور تمہیں چھوڑ دیا تھا۔ [مصنف ابن ابي شيبه/ كتاب الأدب/حدیث: 28061]

حضرت عبد اللہ بن جعفر فرماتے ہیں کہ رسول اللہ صلی اللہ علیہ وآلہ وسلم جب کسی سفر سے واپس آتے اور ہم سے ملاقات ہوجاتی تو آپ صلی اللہ علیہ وآلہ وسلم مجھ سے اور حضرت حسن یا حضرت حسین سے ملتے پھر آپ صلی اللہ علیہ وآلہ وسلم ایک کو اپنے آگے اور دوسرے کو اپنے پیچھے سوار کرلیتے یہاں تک کہ ہم مدینہ منورہ میں داخل ہوجاتے۔ [مصنف ابن ابي شيبه/ كتاب الأدب/حدیث: 28062]

حضرت سفیان بن عطار فرماتے ہیں کہ میں نے امام شعبی کو دیکھا کہ وہ سواری پر کسی آدمی کے پیچھے بیٹھے ہوتے تھے اور فرما رہے تھے کہ سواری کا مالک آگے بیٹھنے کا زیادہ حقدار ہے۔ [مصنف ابن ابي شيبه/ كتاب الأدب/حدیث: 28063]