حضرت سمرہ بن جندب فرماتے ہیں کہ میں نے رسول اللہ صلی اللہ علیہ وآلہ وسلم کو یوں ارشاد فرماتے ہوئے سنا! جس شخص نے اپنے غلام کو قتل کیا ہم بدلے میں اسے قتل کریں گے اور جس نے اپنے غلام کی ناک کاٹ دی تو ہم اس کی ناک کاٹ دیں گے۔ [مصنف ابن ابي شيبه/كتاب الديات/حدیث: 29310]

حضرت ابو ہاشم فرماتے ہیں کہ حضرت ابراہیم نے ارشاد فرمایا: جب کسی شخص نے اپنے غلام کو عمداً قتل کردیا تو بدلے میں اس شخص کو قصاصاً قتل کیا جائے گا۔ [مصنف ابن ابي شيبه/كتاب الديات/حدیث: 29311]

حضرت مغیرہ سے مروی ہے حضرت ابراہیم نے ارشاد فرمایا: اس قاتل کو بھی بدلے میں قتل کیا جائے گا۔ [مصنف ابن ابي شيبه/كتاب الديات/حدیث: 29312]

حضرت شعبہ فرماتے ہیں کہ میں نے حضرت حکم سے ایسے آدمی کے متعلق پوچھا جو اپنے غلام کو عمداً قتل کردے؟ آپ نے فرمایا! میری رائے میں اس شخص کو بدلے میں قتل کیا جائے گا۔ [مصنف ابن ابي شيبه/كتاب الديات/حدیث: 29313]