حضرت عمرو بن مرہ فرماتے ہیں کہ حضرت عبدالرحمن بن ابی لیلیٰ نے فرمایا: کہ میں نے انصار کے شیوخ کو پایا کہ جب باندی زنا کرتی تو وہ اس کو اپنی مجلسوں میں مارتے تھے۔ [مصنف ابن ابي شيبه/كتاب الحدود/حدیث: 30160]

حضرت ابراہیم فرماتے ہیں کہ حضرت علقمہ اور حضرت اسود محلہ کی باندیوں پر مجلسوں میں حد قائم کرتے تھے جب وہ زنا کرتیں۔ [مصنف ابن ابي شيبه/كتاب الحدود/حدیث: 30161]

حضرت جابر فرماتے ہیں کہ حضرت ابو جعفر نے ارشاد فرمایا: تم محلے میں صرف اپنے مملوکوں کو پاک کرو۔ [مصنف ابن ابي شيبه/كتاب الحدود/حدیث: 30162]

حضرت ابو اسحاق فرماتے ہیں کہ حضرت ابو میسرہ اپنی قوم کی باندیوں کو مارتے تھے اور ان کو پا ک کرتے تھے۔ [مصنف ابن ابي شيبه/كتاب الحدود/حدیث: 30163]

حضرت منصور فرماتے ہیں کہ میں حضرت عبدالرحمن بن معقل سے ملا تو میں نے پوچھا! اس باندی کے متعلق آپ کی کیا رائے ہے کہ جس کے بارے میں آپ کے والد نے حضرت عبداللہ بن مسعود سے سوال کیا تھا جس نے زنا کیا تھا اور آپ نے اسے کوڑے مارنے کا حکم دیا تھا: کیا وہ شادی شدہ تھی؟ آپ نے فرمایا: نہیں۔ [مصنف ابن ابي شيبه/كتاب الحدود/حدیث: 30164]

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جب تم میں سے کسی کی باندی زنا کرے تو اسے چاہیے کہ وہ اسے کوڑے مارے پس اگر وہ دوبارہ زنا کرے تو اسے چاہیے کہ وہ اسے کوڑے مارے پس اگر وہ دوبارہ زنا کرے تو اسے چاہیے کہ وہ اسے فروخت کردے اگرچہ بالوں سے بنی ہوئی رسی کے عوض ہو۔ [مصنف ابن ابي شيبه/كتاب الحدود/حدیث: 30165]