حضرت ثمامہ فرماتے ہیں کہ جب حضرت انس بن مالک رضی اللہ عنہ کا غلام زنا کرتا تو آپ اس پر حد جاری کرتے۔ [مصنف ابن ابي شيبه/كتاب الحدود/حدیث: 30150]

حضرت ابوہریرہ، حضرت شبل اور حضرت زید بن خالد فرماتے ہیں کہ ہم لوگ نبی کریم صلی اللہ علیہ وآلہ وسلم کے پاس تھے کہ ایک آدمی نے آپ صلی اللہ علیہ وآلہ وسلم سے باندی کے متعلق پوچھا جو شادی شدہ ہونے سے قبل زنا کرتی ہو؟ آپ صلی اللہ علیہ وآلہ وسلم نے فرمایا: اس کو کوڑے لگاؤ۔ پس اگر وہ زنا کرے تو اس کو کوڑے لگاؤ۔ آپ صلی اللہ علیہ وآلہ وسلم نے تیسری یا چوتھی مرتبہ میں فرمایا: پس ا س کو فروخت کردو اگر چہ بٹ دی ہوئی رسی کے بدلے ہی ہو۔ [مصنف ابن ابي شيبه/كتاب الحدود/حدیث: 30151]

حضرت علی رضی اللہ عنہ فرماتے ہیں کہ نبی کریم صلی اللہ علیہ وآلہ وسلم کو لوگوں کی ایک باندی کے متعلق خبر دی گئی کہ اس نے گناہ کیا ہے تو آپ صلی اللہ علیہ وآلہ وسلم نے مجھے اس کی طرف بھیجا اور فرمایا: تم جا کر اس پر حد قائم کرو پس میں گیا تو میں نے اس کو اس حال میں پایا کہ اس کا خون خشک نہیں ہوا تھا آپ صلی اللہ علیہ وآلہ وسلم نے فرمایا: کیا تم فارغ ہوگئے؟ میں نے عرض کی کہ میں نے اسے اس حال میں پایا کہ اس کا خون خشک نہیں ہوا تھا! آپ صلی اللہ علیہ وآلہ وسلم نے فرمایا: جب اس کا خون خشک ہوجائے تو تم اسے کوڑے مارنا پھر رسول اللہ صلی اللہ علیہ وآلہ وسلم نے ارشاد فرمایا: تم اپنے ماتحتوں پر حد قائم کرو۔ [مصنف ابن ابي شيبه/كتاب الحدود/حدیث: 30152]

حضرت عمرو بن شرحبیل فرماتے ہیں کہ حضرت معقل مزنی حضرت عبداللہ بن مسعود کے پاس آئے اور کہنے لگے میری باندی نے زنا کیا ہے سو اسے کوڑے ماردو! اس پر حضرت عبداللہ بن مسعود نے ارشادفرمایا: اس کو پچاس کوڑے ماردو۔ انہوں نے کہا: وہ دوبارہ زنا کرے تو؟ تو آپ نے فرمایا: اسے کوڑے مارنا۔ [مصنف ابن ابي شيبه/كتاب الحدود/حدیث: 30153]

حضرت حسن بن محمد بن علی رضی اللہ عنہ فرماتے ہیں کہ حضرت فاطمہ نے اپنی باندی پر حد جاری فرمائی۔ [مصنف ابن ابي شيبه/كتاب الحدود/حدیث: 30154]

حضرت خارجہ بن زید فرماتے ہیں کہ حضرت زید نے اپنی باندی پر حد جاری فرمائی۔ [مصنف ابن ابي شيبه/كتاب الحدود/حدیث: 30155]

حضرت ابو قلابہ فرماتے ہیں کہ جب حضرت ابو المھلب کی باندی برا کام کرتی تو آپ اپنی قوم کی مجلس میں اسے کوڑے مارتے تھے۔ [مصنف ابن ابي شيبه/كتاب الحدود/حدیث: 30156]

حضرت ابراہیم فرماتے ہیں کہ صحابہ کے خادم جب زنا کرتے تو آپ ان کو بلاتے اور مجلسوں میں ان کو کوڑے مارتے تھے۔ [مصنف ابن ابي شيبه/كتاب الحدود/حدیث: 30157]

حضرت نافع فرماتے ہیں کہ حضرت ابن عمر رضی اللہ عنہما اپنی باندی کو مارتے تھے جب وہ زنا کرتی۔ [مصنف ابن ابي شيبه/كتاب الحدود/حدیث: 30158]

حضرت اشعث کے والد فرماتے ہیں کہ میں حضرت ابو برزہ کے پاس حاضر تھا انہوں نے اپنی ایک باندی کو مارا جس نے گناہ کا کام کیا تھا راوی کہتے ہیں اس باندی پر چادر لپٹی ہوئی تھی اور آپ کے پا س لوگوں کا ایک گروہ تھا آپ نے یہ آیت تلاوت فرمائی۔ ترجمہ:۔ اور چاہیے کہ مشاہدہ کرے ان کی سزا کا ایک گروہ مومنوں کا۔ [مصنف ابن ابي شيبه/كتاب الحدود/حدیث: 30159]