حضرت عمرو فرماتے ہیں کہ حضرت حسن بصری سے ان چار آدمیوں کے بارے میں جنہوں نے ایک آدمی کے خلاف گواہی دی کہ بیشک اس نے اپنی بیوی کو تین طلاقیں دی ہیں پس اس شخص نے انکار کردیا اور بیوی سے جماع کا اقرار کیا۔ آپ نے فرمایا: اس پر حد نہیں ہوگی اس لیے کہ وہ انکار کررہا ہے۔ [مصنف ابن ابي شيبه/كتاب الحدود/حدیث: 30384]

حضرت قتادہ اور حضرت جابر بن زید نے ارشاد فرمایا: ان دونوں کے درمیان دو اور تین آدمیوں کی گواہی سے تفریق ڈال دی جائے گی اور چار لوگوں کی گواہی سے اسے سنگسار کردیا جائے گا۔ [مصنف ابن ابي شيبه/كتاب الحدود/حدیث: 30385]

حضرت سعید فرماتے ہیں کہ لوگوں نے حضرت حیبی بن ابی ذئب کے حوالہ سے خبر دی ہے کہ حضرت عمر نے ارشاد فرمایا: ان دونوں کے درمیان چار یا اس سے زیادہ آدمیوں کی گواہی سے تفریق کردی جائے گی پس اگر وہ دوبارہ لوٹے تو اسے سنگسار کردیا جائے۔ [مصنف ابن ابي شيبه/كتاب الحدود/حدیث: 30386]

حضرت سعید فرماتے ہیں کہ لوگوں نے حضرت ابراہیم کے حوالے سے خبر دی ہے کہ آپ نے فرمایا: ان دونوں کے درمیان چار آدمیوں کی گواہی سے تفریق کردی جائے گی اور اس سے زیادہ کی صورت میں اسے سنگسار کیا جائے۔ [مصنف ابن ابي شيبه/كتاب الحدود/حدیث: 30387]

حضرت محمد بن سالم فرماتے ہیں کہ حضرت شعبی سے ایک آدمی کے متعلق پوچھا گیا: جس کے خلاف چند گواہوں نے گواہی دی کہ بیشک اس نے اپنی بیوی کو طلاق دے دی ہے پس اس نے اس کا انکار کردیا اور وہ اس سے جماع کرتا تھا، اس کا کیا حکم ہے؟ حضرت شعبی نے فرمایا: اس کے انکار کرنے کی وجہ سے اس سے سزا کو ختم کردیا جائے گا۔ [مصنف ابن ابي شيبه/كتاب الحدود/حدیث: 30388]

حضرت ابن جریج فرماتے ہیں کہ حضرت عطاء سے ایک آدمی کے بارے میں مروی ہے جس نے اپنی بیو ی کو طلاق دی پس دو گواہوں نے گواہی بھی دے دی پھر وہ شخص اس بستی میں آیا جہاں اس کی بیوی تھی اور اس نے اس سے جماع کیا۔ وہ شخص اس سے جماع کا اقرار کرتا ہے اور اس کو طلاق دینے کا انکار کرتا ہے۔ حضرت عطاء نے فرمایا: ان دونوں گواہوں کی گواہی جائز ہوگی اورا ن کے درمیان تفرق کردی جائے گی اور اس شخص پر حد نہیں لگائی جائے گی۔ [مصنف ابن ابي شيبه/كتاب الحدود/حدیث: 30389]

حضرت قتادہ فرماتے ہیں کہ ایک آدمی نے اپنی بیوی کو تین طلاقیں دیں پھر اس نے اس کے بعد اس سے جماع کرنا شروع کردیا تو اس بارے میں حضرت عمار سے پوچھا گیا؟ آپ نے فرمایا: اگر مجھے اس پر قدرت ہوتی تو میں ضرور اس کو سنگسار کردیتا۔ [مصنف ابن ابي شيبه/كتاب الحدود/حدیث: 30390]

حضرت خلاس سے بھی حضرت عمار کا مذکورہ ارشاد منقول ہے۔ [مصنف ابن ابي شيبه/كتاب الحدود/حدیث: 30391]

حضرت عیسیٰ بن عاصم فرماتے ہیں کہ چند لوگ سفر میں نکلے ان کا گزر ایک آدمی کے پاس سے ہواتو انہوں نے اس کے پاس قیام کیا اس دوران اس آدمی نے اپنی بیوی کو تین طلاقیں دے دیں پھر وہ واپس لوٹے تو انہوں نے اس کو اس عورت کے ساتھ پایا سو انہوں نے اس کو حضرت شریح کے سامنے پیش کیا اور کہنے لگے: بیشک اس شخص نے اپنی بیوی کو تین طلاقیں دی تھیں اور ہم نے اسے اس عورت کے ساتھ پایا ہے اور وہ آدمی انکار کررہا تھا۔ اس پر آپ نے فرمایا: کیا تم گواہی دیتے ہو کہ یہ شخص زانی ہے؟ پس انہوں نے اپنے قول کو دھرایا جیسا انہوں نے کہا تھا پھر آپ نے پوچھا: کیا تم گواہی دیتے ہو کہ یہ شخص زانی ہے؟ انہوں نے پھر اپنی بات دھرائی سو آپ نے ان کے درمیان تفریق کردی اور ان دونوں پر حد نہیں لگائی اور ان کی گواہی کو جائز قرار دیا۔ [مصنف ابن ابي شيبه/كتاب الحدود/حدیث: 30392]