حضرت حنظلہ سدوسی فرماتے ہیں کہ میں نے حضرت انس بن مالک رضی اللہ عنہ کو یوں فرماتے ہوئے سنا: کوڑے کے بارے میں حکم دیا جاتا تھا کہ اس کا نچلا کنارہ کاٹ دیا جائے پھر اس کو دو پتھروں کے درمیان رکھ کر باریک کرلیا جائے پھر اس سے مارا جائے۔ میں نے حضرت انس سے پوچھا: یہ کس کے زمانے میں ہوتا تھا؟ آپ نے فرمایا: حضرت عمر بن خطاب کے زمانے میں۔ [مصنف ابن ابي شيبه/كتاب الحدود/حدیث: 30591]

حضرت ابو ماجد فرماتے ہیں کہ حضرت عبداللہ بن مسعود نے کوڑا منگوایا اور اس کے نچلے کنارے کو باریک کیا یہاں تک کہ وہ کوڑا باریک ہوگیا آپ نے جلاد کو بلایا اور فرمایا! کوڑے مارو۔ [مصنف ابن ابي شيبه/كتاب الحدود/حدیث: 30592]

حضرت زید بن اسلم فرماتے ہیں کہ نبی کریم صلی اللہ علیہ وآلہ وسلم کے پاس ایک آدمی لایا گیا جس نے سزا پائی تھی، تو ایک نیا سخت قسم کا کوڑا لایا گیا آپ صلی اللہ علیہ وآلہ وسلم نے ارشاد فرمایا: اس سے کم لاؤ تو ٹوٹا ہوا اور درمیان سے چیرا ہوا ایک کوڑا لایا گیا جس کو نرم بنایا گیا تھا آپ صلی اللہ علیہ وآلہ وسلم نے فرمایا: ہاں یہ ٹھیک ہے۔ [مصنف ابن ابي شيبه/كتاب الحدود/حدیث: 30593]