حضرت محمد بن عبد الرحمن بن یزید فرماتے ہیں کہ میں حضرت عبد اللہ بن مسعود رضی اللہ عنہ کے ساتھ وقوف عرفہ کے اختتام پر منیٰ واپس لوٹا، تو آپ نے سات کنکریاں ماریں، آپ ہر کنکری کے ساتھ تکبیر پڑھتے تھے، اور پھر واوی میں اترے اور یوں دعا فرمائی، اے اللہ! اس حج کو مقبول بنا دے اور گناہ کی بخشش فرما دے، پھر یوں ارشاد فرمایا: اس طرح میں نے دیکھا تھا جب آپ صلی اللہ علیہ وآلہ وسلم پر سورة بقرہ نازل ہوئی تو آپ صلی اللہ علیہ وآلہ وسلم نے ایسا کیا۔ [مصنف ابن ابي شيبه/كتاب الدعاء/حدیث: 31629]

حضرت الھیثم بن حنش فرماتے ہیں کہ میں نے رمی جمار کے وقت حضرت ابن عمر رضی اللہ عنہما کو یوں دعا کرتے ہوئے سنا: اے اللہ! اس حج کو مقبول بنا دے، اور گناہوں کی بخشش فرما دے۔ [مصنف ابن ابي شيبه/كتاب الدعاء/حدیث: 31630]

حضرت مغیرہ فرماتے ہیں کہ میں نے حضرت ابراہیم سے پوچھا: جب میں شیطان کو کنکری ماروں تو کیا دعا پڑھوں؟ آپ نے ارشاد فرمایا: یہ دعا پڑھو: اے اللہ! اس حج کو مقبول بنا دے، اور گناہوں کو بخش دے، مغیرہ کہتے ہیں: میں نے پوچھا: کیا یہ کلمات میں ہر کنکری کے ساتھ پڑھوں؟ تو آپ نے ارشاد فرمایا! جی ہاں! اگر تم چاہو۔ [مصنف ابن ابي شيبه/كتاب الدعاء/حدیث: 31631]