حضرت مسروق فرماتے ہیں کہ حضرت عبد اللہ بن مسعود رضی اللہ عنہ مصحف میں اعشار کی نشانی ڈالنا مکروہ سمجھتے تھے۔ [مصنف ابن ابي شيبه/كتاب فضائل القرآن/حدیث: 32244]

حضرت حجاج فرماتے ہیں کہ حضرت عطاء مصحف میں اعشار کی نشانی لگانا مکروہ سمجھتے تھے۔ اور یہ بھی کہ اس میں قرآن کے علاوہ کوئی اور بات لکھی جائے۔ [مصنف ابن ابي شيبه/كتاب فضائل القرآن/حدیث: 32245]

حضرت حماد نے بھی حضرت ابراہیم سے ما قبل جیسی حدیث نقل کی ہے۔ [مصنف ابن ابي شيبه/كتاب فضائل القرآن/حدیث: 32246]

حضرت لیث فرماتے ہیں کہ حضرت مجاہد مکروہ سمجھتے تھے کہ مصحف میں اعشار کی نشانی لگائی جائے یا کسی چیز کی تفصیل لکھی جائے اور یوں کہنا بھی مکروہ سمجھتے تھے، سورة البقرۃ، اور یوں کہتے: وہ سورت جس میں بقرہ کا ذکر ہے۔ [مصنف ابن ابي شيبه/كتاب فضائل القرآن/حدیث: 32247]

حضرت لیث فرماتے ہیں کہ حضرت مجاہد نے مصحف میں اعشار کی نشانی لگانا ناپسند کیا۔ [مصنف ابن ابي شيبه/كتاب فضائل القرآن/حدیث: 32248]

حضرت زبرقان فرماتے ہیں کہ میں نے حضرت ابو رزین سے عرض کیا: میرے پاس ایک مصحف ہے میں چاہتا ہوں کہ اس پر سونے کی مہر لگا ؤں اور ہر سورت کے شروع میں لکھ دوں۔ اتنی اور اتنی آیات؟ تو حضرت ابو رزین نے فرمایا: تم قرآن میں اس چیز کو مت زیادہ کرو جو دنیا کی چیزیں ہیں نہ تھوڑی نہ زیادہ۔ [مصنف ابن ابي شيبه/كتاب فضائل القرآن/حدیث: 32249]

حضرت ہشام فرماتے ہیں کہ حضرت محمد ان نشانیوں کو قرآن مجید میں مکروہ سمجھتے تھے۔ جن میں قاف اور کاف ہو۔ [مصنف ابن ابي شيبه/كتاب فضائل القرآن/حدیث: 32250]

حضرت مغیرہ فرماتے ہیں کہ حضرت ابراہیم مکروہ سمجھتے تھے مصحف میں اعشار کی نشانی لگانے کو۔ [مصنف ابن ابي شيبه/كتاب فضائل القرآن/حدیث: 32251]

حضرت مغیرہ فرماتے ہیں کہ حضرت ابراہیم مکروہ سمجھتے تھے مصحف میں نقطے لگانے کو اور سورة کے اختتام پر اس طرح اور اس طرح نشانی لگانے کو۔ [مصنف ابن ابي شيبه/كتاب فضائل القرآن/حدیث: 32252]

حضرت حجاج اپنے استاذ سے نقل کرتے ہیں کہ حضرت عبد اللہ بن مسعود رضی اللہ عنہ نے ایک مصحف میں خاص نشان لگا دیکھا تو اس کو مٹا دیا اور فرمایا: قرآن میں اس کے غیر کی آمیزش مت کرو۔ [مصنف ابن ابي شيبه/كتاب فضائل القرآن/حدیث: 32253]