حضرت ہشام رحمہ اللہ بیان کرتے ہیں کہ یحییٰ بن سعید بن عاص رحمہ اللہ نے عبدالرحمٰن بن حکم کی بیٹی سے شادی کی اور اسے طلاق دے کر اپنے ہاں سے نکال دیا، حضرت عروہ رحمہ اللہ نے ان پر اعتراض کیا تو انہوں نے جواب دیا کہ فاطمہ رضی اللہ عنہا اپنے خاوند کے گھر سے چلی گئی تھیں، عروہ رحمہ اللہ نے کہا کہ میں نے حضرت عائشہ رضی اللہ عنہا کو آ کر خبر دی تو انہوں نے کہا کہ فاطمہ بنت قیس رضی اللہ عنہا کے حق میں اس واقعے کو بیان کرنا اچھا نہیں ہے (کیونکہ حضرت عائشہ رضی اللہ عنہا کے نزدیک یہ حضرت فاطمہ رضی اللہ عنہا کے مخصوص حالات کی بنا پر ہوا تھا)۔ [صحيح مسلم/كِتَاب الطَّلَاقِ/حدیث: 3717]

حضرت فاطمہ بنت قیس رضی اللہ عنہا بیان کرتی ہیں، میں نے عرض کیا: ”اے اللہ کے رسول! میرے خاوند نے مجھے تینوں طلاقیں دے دی ہیں، اور مجھے خطرہ ہے کہ مجھ پر ہجوم کیا جائے گا (کوئی اچانک گھس آئے گا)۔“ تو آپ صلی اللہ علیہ وسلم نے انہیں مکان بدلنے کا حکم دیا۔ [صحيح مسلم/كِتَاب الطَّلَاقِ/حدیث: 3718]

حضرت عائشہ رضی اللہ عنہا بیان کرتی ہیں کہ فاطمہ رضی اللہ عنہا کے لیے یہ بیان کرنا کہ ان کے لیے نہ رہائش ہے اور نہ نفقہ، بہتر نہیں ہے۔ [صحيح مسلم/كِتَاب الطَّلَاقِ/حدیث: 3719]

حضرت عائشہ رضی اللہ عنہا فرماتی ہیں، فاطمہ رضی اللہ عنہا کے حق میں یہ بات بیان کرنا بہتر نہیں ہے، یعنی (مطلقہ ثلاثہ کے لیے) نہ رہائش ہے اور نہ خرچہ۔ عروہ نے حضرت عائشہ رضی اللہ عنہا سے پوچھا، کیا آپ کو حکم کی فلاں بیٹی کی حرکت کا علم ہے؟ اس کے خاوند نے اسے طلاقِ بتہ دے دی تو وہ اس کے گھر سے چلی گئی، تو انہوں نے کہا، بہت برا کام کیا، عروہ نے پوچھا، کیا آپ نے فاطمہ رضی اللہ عنہا کی بات نہیں سنی؟ تو انہوں نے جواب دیا، ہاں، اس کے حق میں یہ بیان کرنا بہتر نہیں ہے (کیونکہ اگر میں اس کی وجہ بیان کروں گی، تو اسے تکلیف ہو گی)۔ [صحيح مسلم/كِتَاب الطَّلَاقِ/حدیث: 3720]