حارث حضرت علی رضی اللہ عنہ سے اس آدمی کے بارے میں روایت کرتے ہیں جس نے کسی آدمی کے لئے وصیت کی پھر جس کے لئے وصیت کی تھی وہ اس وصیت کرنے والے سے پہلے ہی مرگیا، آپ نے فرمایا اس وصیت کے حق دار اس شخص کے ورثاء ہیں۔ [مصنف ابن ابي شيبه/كتاب الوصايا/حدیث: 32772]

حفص فرماتے ہیں کہ میں نے اس بارے میں عمرو رضی اللہ عنہ سے سوال کیا تھا انہوں نے فرمایا کہ حضرت حسن رحمہ اللہ فرمایا کرتے تھے کہ یہ وصیت اس شخص کے ورثاء کو جائے گی۔ [مصنف ابن ابي شيبه/كتاب الوصايا/حدیث: 32773]

ابو معشر حضرت ابراہیم سے روایت کرتے ہیں کہ جب کوئی آدمی کسی کے لئے کچھ مال کی وصیت کرے اور جس دن اس نے وصیت کی اسی دن مرجائے تو وصیت ورثاء کی طرف لوٹے گی (کہ وہ اس کو نافذ کریں گے) اور جب کسی کے لئے وصیت کی اور جس کے لئے وصیت کی تھی مرجائے تو اس کے ورثاء وصیت کے حق دارہوں گے۔ [مصنف ابن ابي شيبه/كتاب الوصايا/حدیث: 32774]

ابو قلابہ فرماتے ہیں کہ مردے کے لئے وصیت معتبر نہیں۔ [مصنف ابن ابي شيبه/كتاب الوصايا/حدیث: 32775]

شعبی فرماتے ہیں کہ مردے کے لئے وصیت معتبر نہیں۔ [مصنف ابن ابي شيبه/كتاب الوصايا/حدیث: 32776]

زہری اس شخص کے بارے میں جو کچھ وصیت کرے لیکن جس کے لئے وصیت کی وہ اس سے پہلے ہی مرجائے فرماتے ہیں: اس وصیت کا کوئی اعتبار نہیں، کیونکہ اس نے گویا مردے کے لئے وصیت کی ہے۔ [مصنف ابن ابي شيبه/كتاب الوصايا/حدیث: 32777]

حماد فرماتے ہیں اس شخص کے بارے میں جس نے کوئی وصیت کی اور جس کے لئے وصیت کی تھی وہ اس سے پہلے مرجائے، کہ وہ وصیت باطل ہوجائے گی، اور اگر پہلے وصیت کرنے والا مرجائے پھر وہ جس کے لئے وصیت کی گئی تھی تو اس کے ورثاء اس مال کے حق دار ہوں گے۔ [مصنف ابن ابي شيبه/كتاب الوصايا/حدیث: 32778]