حضرت ابراہیم فرماتے ہیں کہ نبی کریم صلی اللہ علیہ وآلہ وسلم نے تین دادیوں کو مال عنایت فرمایا، راوی کہتے ہیں کہ میں نے حضرت ابراہیم سے پوچھا کہ وہ کون کون ہیں؟ فرمایا کہ باپ کی دادی اور نانی، اور میت کی نانی۔ [مصنف ابن ابي شيبه/كتاب الفرائض/حدیث: 33399]

برد سے روایت ہے کہ حضرت مکحول فرماتے ہیں کہ تین دادیاں وارث ہوتی ہیں اور ان میں سے جو نسب میں سب سے نچلی ہو وہ ان میں سب سے زیادہ مال کے چھٹے حصّے کی حق دار ہے۔ [مصنف ابن ابي شيبه/كتاب الفرائض/حدیث: 33401]

داؤد روایت کرتے ہیں کہ حضرت عامر نے فرمایا کہ جب چار دادیاں جمع ہوجائیں تو ماں کی دادی وارث نہیں ہوگی۔ [مصنف ابن ابي شيبه/كتاب الفرائض/حدیث: 33402]

حضرت ابراہیم سے روایت ہے کہ حضرت ابن مسعود رضی اللہ عنہ نے فرمایا کہ تین دادیاں وارث ہوتی ہیں: دو دادیاں ماں کی طرف سے اور ایک دادی باپ کی طر ف سے۔ [مصنف ابن ابي شيبه/كتاب الفرائض/حدیث: 33403]

طاوس حضرت ابن عباس رضی اللہ عنہما کا فرمان نقل کرتے ہیں کہ چاروں دادیاں وارث ہوتی ہیں۔ [مصنف ابن ابي شيبه/كتاب الفرائض/حدیث: 33404]

سھم فرائضی فرماتے ہیں کہ حضرت جابر بن زید رضی اللہ عنہ چار دادیوں کو وارث بنایا کرتے تھے۔ [مصنف ابن ابي شيبه/كتاب الفرائض/حدیث: 33405]

ہشام حضرت حسن بصری رضی اللہ عنہ سے نقل کرتے ہیں کہ آپ سے چار دادیوں کے بارے میں سوال کیا گیا تو آپ نے فرمایا کہ ان میں سے تین وارث ہوں گی اور ماں کی دادی وارث نہیں ہوگی۔ [مصنف ابن ابي شيبه/كتاب الفرائض/حدیث: 33406]

ہشام حضرت محمد رحمہ اللہ سے نقل کرتے ہیں کہ وہ نو دادیوں کو وارث بنایا کرتے تھے اور فرماتے کہ جب کوئی دادی زیادہ قریب ہو تو مال اس کو ہی ملے گا باقی دادیوں کو نہیں ملے گا۔ [مصنف ابن ابي شيبه/كتاب الفرائض/حدیث: 33407]

یونس حضرت حسن سے روایت کرتے ہیں کہ آپ تین دادیوں کو وارث بناتے تھے اور فرماتے کہ ان میں سے جو زیادہ قریب ہو اسی کو مال دیا جائے گا نہ کہ دوسری دادیوں کو، اور جب دادیاں برابر درجے کی ہوں تو مال ان کے درمیان تقسیم کردیا جائے گا۔ [مصنف ابن ابي شيبه/كتاب الفرائض/حدیث: 33408]