حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے قیامت کے حالات کا تذکرہ کرتے ہوئے فرمایا کہ لوگ حضرت آدم کے پاس جائیں گے تو وہ فرمائیں گے کہ نوح کے پاس جاؤ، لوگ ان سے کہیں گے کہ اے نوح! آپ زمین والوں کی طرف بھیجے جانے والے پہلے رسول ہیں۔ [مصنف ابن ابي شيبه/كتاب الأوائل/حدیث: 38687]

حضرت عروہ فرماتے ہیں کہ اللہ کے راستے میں سب سے پہلے تلوار سونتنے والے حضرت زبیر ہیں۔ [مصنف ابن ابي شيبه/كتاب الأوائل/حدیث: 38688]

حضرت ابن عباس رضی اللہ عنہما فرماتے ہیں کہ جب سورة المزمل کی ابتدائی آیات نازل ہوئیں تو اس وقت صحابہ کرام رات کو اتنی دیر قیام کرتے تھے جتنا قیام رمضان کے مہینے میں کرتے تھے۔ اس کے اول وآخر کے درمیان ایک سال ہوتا تھا۔ [مصنف ابن ابي شيبه/كتاب الأوائل/حدیث: 38689]

حضرت کعب فرمایا کرتے تھے کہ شہروں میں سب سے پہلے ویران ہونے والے شہروں کے دو بازو ہیں۔ ان سے کسی نے پوچھا کہ شہروں کے دو بازو کیا ہیں؟ انہوں نے فرمایا کہ بصرہ اور کوفہ۔ [مصنف ابن ابي شيبه/كتاب الأوائل/حدیث: 38690]

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وآلہ وسلم نے فرمایا کہ سب سے پہلے حضرت آدم نے انکار کیا۔ [مصنف ابن ابي شيبه/كتاب الأوائل/حدیث: 38691]

حضرت عطاء فرماتے ہیں کہ سب سے پہلے قسامہ کے بارے میں حضر ت عمر بن خطاب نے قسم لی۔ [مصنف ابن ابي شيبه/كتاب الأوائل/حدیث: 38692]

حضرت علی رضی اللہ عنہ بن ربیعہ کہتے ہیں کہ کوفہ میں سب سے پہلے قرظہ بن کعب کا نوحہ پڑھا گیا۔ [مصنف ابن ابي شيبه/كتاب الأوائل/حدیث: 38693]

حضرت اسماء بنت یزید فرماتی ہیں کہ رسول اللہ صلی اللہ علیہ وآلہ وسلم نے حضر ت سعد بن معاذ کی والدہ سے فرمایا کہ تمہارے آنسو خشک کیوں نہیں ہوتے اور تمہارا غم کم کیوں نہیں ہوتا! تمہارا بیٹا وہ پہلا شخص ہے جس کے لئے اللہ تعالیٰ مسکرائے ہیں اور اللہ کا عرش لرز اٹھا ہے۔ [مصنف ابن ابي شيبه/كتاب الأوائل/حدیث: 38694]

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وآلہ وسلم نے ارشادفرمایا کہ قیامت کے دن سب سے پہلے حضرت ابراہیم کو کپڑے پہنائے جائیں گے۔ [مصنف ابن ابي شيبه/كتاب الأوائل/حدیث: 38695]

حضرت سعید بن جبیر فرماتے ہیں کہ قیامت کے دن جب لوگوں کو اٹھایا جائے گا تو وہ ننگے جسم اور ننگے پاؤں ہوں گے اور سب سے پہلے حضرت ابراہیم کو کپڑا عطا کیا جائے گا۔ [مصنف ابن ابي شيبه/كتاب الأوائل/حدیث: 38696]