حضرت حذیفہ رضی اللہ عنہ نے اپنے ساتھیوں کو مخاطب کرکے فرمایا کہ کیا تم نے یوم الدار کو دیکھا۔ یعنی حضرت عثمان کی شہادت۔ وہ پہلا فتنہ تھا اور آخری فتنہ دجال کا ہوگا۔ [مصنف ابن ابي شيبه/كتاب الأوائل/حدیث: 38667]

حضرت عامر فرماتے ہیں کہ وہ پہلے دادا جنہوں نے اپنے پوتوں کو حاصل کرنے کے لئے جھگڑا کیا حضرت عمر بن خطاب تھے۔ ان کے صاحبزادے کا انتقال ہوا اور انہوں نے دو بیٹے چھوڑے۔ حضرت عمر ان کے حصول کا جھگڑا لے کر حضرت زید بن ثابت کے پاس گئے۔ جب انہوں نے دیکھا کہ حضرت زید ان کے خلاف فیصلہ کریں گے تو فرمایا کہ میری اولاد کے بارے میں کون میرا فریق بن سکتا ہے؟ حضرت زید نے فرمایا کہ ان کے والد آپ نہیں کوئی اور ہے۔ پھر ان کے درمیان شراکت کرادی۔ [مصنف ابن ابي شيبه/كتاب الأوائل/حدیث: 38668]

حضرت ولید بن عبادہ اپنے والد کے بارے میں روایت کرتے ہیں کہ مرض الوفات میں ان کے پاس گئے تو انہوں نے فرمایا کہ میں نے رسول اللہ صلی اللہ علیہ وآلہ وسلم کو فرماتے ہوئے سنا ہے کہ اللہ تعالیٰ نے سب سے پہلے قلم کو پیدا کیا۔ پھر اس سے فرمایا تو چل۔ پھر قلم چلا اور اس نے قیامت تک وقوع پذیر ہونے والے تمام واقعات کو لکھ لیا۔ [مصنف ابن ابي شيبه/كتاب الأوائل/حدیث: 38669]

حضرت زہری فرماتے ہیں کہ جمعہ کی پہلی اذان حضرت عثمان نے شروع کرائی تاکہ بازار والوں کو اطلاع ہوجائے۔ [مصنف ابن ابي شيبه/كتاب الأوائل/حدیث: 38670]

حضرت زہری فرماتے ہیں کہ اذان امام کے خروج کے وقت ہوتی تھی۔ پھر امیر المومنین حضرت عثمان نے لوگوں کو جمع کرنے کے لئے دوسری اذان کو شروع کرایا۔ [مصنف ابن ابي شيبه/كتاب الأوائل/حدیث: 38671]

حضرت جریر بن حازم کہتے ہیں کہ ایک آدمی نے حضرت محمد بن سیرین سے سے سوال کیا کہ آپ ان قصہ خوانوں کی صحبت کے بارے میں کیا فرماتے ہیں؟ انہوں نے فرمایا کہ میں نہ تو تمہیں اس کا حکم دیتا ہوں اور نہ ہی اس سے منع کرتا ہوں۔ قصہ خوانی ایک نئی چیز ہے جسے خوارج نے شروع کیا ہے۔ [مصنف ابن ابي شيبه/كتاب الأوائل/حدیث: 38672]

حضرت مجاہد فرماتے ہیں کہ جب اللہ تعالیٰ نے حضرت آدم کو پیدا کیا تو ان کی آنکھوں کو باقی جسم سے پہلے بنایا۔ انہوں نے کہا کہ اے میرے رب میری تخلیق کو سورج کے غروب ہونے سے پہلے پورا فرما۔ اسی بارے میں اللہ تعالیٰ فرماتے ہیں { وَکَانَ الإِنْسَاْن عَجُولاً }۔ [مصنف ابن ابي شيبه/كتاب الأوائل/حدیث: 38673]

حضرت ابو مالک فرماتے ہیں کہ سورة التوبہ کی آیات میں سب سے پہلے یہ آیت نازل ہوئی { انْفِرُوا خِفَافًا وَثِقَالاًَ }۔ [مصنف ابن ابي شيبه/كتاب الأوائل/حدیث: 38674]

حضرت محمد بن کعب فرماتے ہیں کہ اللہ تعالیٰ نے جسموں سے پہلے روحوں کو پیدا کیا اور ان سے وعدہ لیا۔ [مصنف ابن ابي شيبه/كتاب الأوائل/حدیث: 38675]

حضرت حارث فرماتے ہیں کہ وضو میں سب سے پہلے ہتھیلیوں کو دھونے کا حکم ہوا۔ [مصنف ابن ابي شيبه/كتاب الأوائل/حدیث: 38676]