سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے یہ بات ارشاد فرمائی: ”دس چیزیں فطرت کا حصہ ہیں: مونچھیں چھوٹی کروانا، داڑھی بڑھانا، مسواک کرنا، پانی کے ذریعہ ناک صاف کرنا، ناخن تراشنا، بغل کے بال صاف کرنا، زیر ناف بال صاف کرنا اور پانی کے ذریعے استنجاء کرنا۔“ زکریا نامی راوی نے یہ بات بیان کی ہے: مصعب نامی راوی نے یہ بات بیان کی ہے: ”دسویں بات میں بھول گیا ہوں، البتہ وہ کلی کرنا ہو گی۔“ خارجہ نامی راوی نے اس بات کو زکریا نامی راوی کے حوالے سے نقل کیا ہے اور یہ بات بیان کی ہے: حدیث میں استعمال ہونے والے لفظ ”انتقاص الماء“ کا مطلب پانی کے ذریعے استنجاء کرنا ہے۔ اس بات کو نقل کرنے میں مصعب بن شبہ نامی راوی منفرد ہیں۔ ابوبشر اور سلیمان نامی راوی نے اس بات کو مختلف طور پر نقل کیا ہے، انہوں نے اس روایت کو طلق بن حبیب کے حوالے سے، ان کے اپنے قول کے طور پر نقل کیا ہے اور یہ روایت ”مرفوع“ حدیث کے طور پر نقل نہیں کی۔ [سنن الدارقطني/كِتَابُ الطَّهَارَةِ/حدیث: 315]