امام ابوداؤد فرماتے ہیں: اعمش سے منقول حدیث ضعیف ہونے پر دلالت کرتی ہے۔ وہ یہ ہے: حفص نامی راوی نے اسے موقوف روایت کے طور پر اعمش سے نقل کیا ہے اور اس بات کا انکار کیا ہے کہ یہ روایت مرفوع ہے اور اس بات کا بھی انکار کیا ہے کہ اس میں ہر نماز کے لیے وضو کرنے کا ذکر ہے۔ حدیث کی عروہ کے حوالے سے نقل کردہ روایت کے ضعیف ہونے پر بھی دلالت کرتی ہے۔ زہری نے اس روایت کو عروہ کے حوالے سے سیدہ عائشہ رضی اللہ عنہا سے نقل کیا ہے اور اس میں یہ الفاظ ہیں کہ وہ خاتون ہر نماز کے لیے غسل کیا کرتی تھی۔ یہ تمام بیان امام ابوداؤد کا ہے۔ [سنن الدارقطني/ كِتَابُ الْحَيْضِ/حدیث: 827]

سیدہ عائشہ رضی اللہ عنہا فرماتی ہیں: ”مستحاضہ عورت نماز ادا کرے گی اگرچہ اس کے خون کے قطرے چٹائی پر گر رہے ہوں۔“ حفص نامی راوی نے اس حدیث کو مرفوع روایت کے طور پر نقل نہیں کیا جبکہ اسامہ نامی راوی نے اس کی متابعت کی ہے۔ [سنن الدارقطني/ كِتَابُ الْحَيْضِ/حدیث: 828]

سیدہ عائشہ رضی اللہ عنہا کے بارے میں یہ بات منقول ہے: ان سے مستحاضہ عورت کے بارے میں دریافت کیا گیا۔ انہوں نے فرمایا: ”وہ نماز ترک نہیں کرے گی اگرچہ خون کے قطرے چٹائی پر گر رہے ہوں۔“ [سنن الدارقطني/ كِتَابُ الْحَيْضِ/حدیث: 829]

سیدہ عائشہ رضی اللہ عنہا کے بارے میں یہ بات منقول ہے: ان سے مستحاضہ عورت کے بارے میں دریافت کیا گیا تو انہوں نے فرمایا: ”وہ نماز ترک نہیں کرے گی، اگرچہ خون کے قطرے چٹائی پر گر رہے ہوں۔“ وکیع نامی راوی نے اسے مرفوع حدیث کے طور پر نقل کیا ہے۔ علی بن ہاشم اور حفص نامی راوی نے اسے موقوف روایت کے طور پر نقل کیا ہے۔ [سنن الدارقطني/ كِتَابُ الْحَيْضِ/حدیث: 830]

یحییٰ بن معین فرماتے ہیں: حبیب بن ثابت نامی راوی نے عروہ کے حوالے سے دو روایات نقل کی ہیں لیکن ان دونوں کی کوئی حیثیت نہیں ہے۔ [سنن الدارقطني/ كِتَابُ الْحَيْضِ/حدیث: 831]

سیدہ عائشہ رضی اللہ عنہا بیان کرتی ہیں: فاطمہ بنت ابوحبیش آئی اور بولی: ”مجھے استحاضہ کی شکایت ہے، میں پاک نہیں ہوتی۔“ نبی کریم صلی اللہ علیہ وسلم نے ارشاد فرمایا: ”حیض کے مخصوص ایام کے دوران نماز ادا نہ کرو، اس کے بعد غسل کرو اور پھر روزے بھی رکھو، نماز بھی پڑھو اگرچہ خون کے قطرے چٹائی پر گر رہے ہوں۔“ اس خاتون نے عرض کی: ”میں استحاضہ میں مبتلا ہوں، میرا خون نہیں رکتا۔“ تو نبی کریم صلی اللہ علیہ وسلم نے فرمایا: ”یہ کسی اور رگ کا خون ہے، یہ حیض کا خون نہیں ہے۔ جب حیض آ جائے تو تم نماز کو ترک کر دو اور جب وہ ختم ہو جائے تو غسل کر کے نماز پڑھنا شروع کر دو۔“ [سنن الدارقطني/ كِتَابُ الْحَيْضِ/حدیث: 832]

سیدہ عائشہ رضی اللہ عنہا یہ فرماتی تھیں: ”قروء سے مراد طہر ہے۔“ [سنن الدارقطني/ كِتَابُ الْحَيْضِ/حدیث: 833]

سیدہ حمنہ بنت جحش رضی اللہ عنہا بیان کرتی ہیں: میں انتہائی استحاضہ میں مبتلا تھی۔ میں اس کے بارے میں مسئلہ دریافت کرنے کے لیے نبی کریم صلی اللہ علیہ وسلم کی خدمت میں حاضر ہوئی۔ نبی کریم صلی اللہ علیہ وسلم اس وقت زینب بنت جحش کے گھر موجود تھے۔ وہ خاتون بیان کرتی ہیں: میں نے عرض کی: ”یا رسول اللہ! میں انتہائی استحاضہ میں مبتلا ہوں اور زیادہ شکایت ہے۔ اس کے بارے میں آپ صلی اللہ علیہ وسلم کیا رائے دیتے ہیں؟ اس چیز نے مجھے نماز سے روک دیا ہے۔“ تو نبی کریم صلی اللہ علیہ وسلم نے ارشاد فرمایا: ”تم روئی رکھ لیا کرو، خون رک جائے گا۔“ اس خاتون نے عرض کی: ”زیادہ ہوتا ہے۔“ تو نبی کریم صلی اللہ علیہ وسلم نے ارشاد فرمایا: ”تم پٹی باندھ لیا کرو۔“ اس نے عرض کی: ”اس سے بھی زیادہ ہوتا ہے۔“ تو نبی کریم صلی اللہ علیہ وسلم نے فرمایا: ”تم کپڑا رکھ لیا کرو۔“ عرض کی: ”اس سے بھی زیادہ ہے۔“ تو نبی کریم صلی اللہ علیہ وسلم نے فرمایا: ”میں تمہیں دو باتوں کی ہدایت کرتا ہوں۔ ان میں سے جو بھی کر لو وہ دوسرے کی جگہ کافی ہے۔ اگر تم دونوں کی قوت رکھتی ہو تو تمہیں زیادہ پتہ ہے۔“ نبی کریم صلی اللہ علیہ وسلم نے فرمایا: ”یہ شیطان کا ٹھونگا ہے۔ اللہ کے علم کے مطابق تمہارے حیض کے ایام چھ یا سات دن ہیں۔ پھر اس کے بعد تم غسل کر لو، پھر تم دیکھو کہ اب تم پاک ہو گئی ہو تو اس جگہ کو صاف کر لو، پھر تم چوبیس دنوں تک یا تئیس دنوں تک نماز ادا کرتی رہو اور روزہ رکھتی رہو۔ ایسا کرنا تمہارے لیے جائز ہو گا۔ ہر مہینے میں اسی طرح کرو جیسا کہ عام طور پر عورتیں حیض اور طہر کے حوالے سے اپنے حیض اور طہر کی مخصوص مدت بسر کرتی ہیں۔ اور اگر تم اس بات کی طاقت رکھتی ہو تو ظہر کی نماز کو موخر کرو اور عصر کی نماز کو جلدی ادا کرو، پھر غسل کر کے پھر ظہر اور عصر کو ایک ساتھ ادا کر لو۔ پھر تم مغرب کو موخر کرو اور عشاء کو جلدی پڑھ لو اور غسل کر کے ان دونوں نمازوں کو ایک ساتھ ادا کرو تو تم ایسا بھی کر سکتی ہو۔ تم فجر کے لیے الگ سے غسل کرو۔ اس طرح تم نمازیں ادا کرو، روزہ رکھو اگر تم اس بات کی طاقت رکھتی ہو۔“ نبی کریم صلی اللہ علیہ وسلم نے ارشاد فرمایا: ”میرے نزدیک یہ بات پسندیدہ ہے۔“ [سنن الدارقطني/ كِتَابُ الْحَيْضِ/حدیث: 834]

یہی روایت ایک اور سند کے ہمراہ بھی منقول ہے۔ [سنن الدارقطني/ كِتَابُ الْحَيْضِ/حدیث: 835]

یہی روایت ایک اور سند کے ہمراہ بھی منقول ہے۔ [سنن الدارقطني/ كِتَابُ الْحَيْضِ/حدیث: 836]