عبدالرحمن بن ابولیلی بیان کرتے ہیں: سیدنا معاذ بن جبل رضی اللہ عنہ نے یہ بات بیان کی ہے: ایک انصاری شخص عبداللہ بن زید رضی اللہ عنہ نبی کریم صلی اللہ علیہ وسلم کے پاس آئے اور عرض کی: ”یا رسول اللہ! میں نے خواب میں دیکھا کہ ایک شخص آسمان سے نازل ہوا اس نے دو چادریں اوڑھی ہوئی تھیں۔ وہ مدینہ منورہ کی ایک دیوار پر اترا۔ اس نے اذان کے کلمات دو مرتبہ کہے پھر وہ بیٹھ گیا پھر وہ کھڑا ہو گیا پھر اس نے وہ کلمات دو دو مرتبہ کہے۔“ ابوبکر بن عیاش نامی راوی نے یہ بات بیان کی ہے: یہ اسی کی مانند ہے جس طرح آج کل اذان دی جاتی ہے۔ تو نبی کریم صلی اللہ علیہ وسلم نے ارشاد فرمایا: ”تم یہ بلال کو سکھا دو۔“ تو سیدنا عمر رضی اللہ عنہ نے عرض کی: ”میں نے بھی اسی طرح کا خواب دیکھا ہے جس طرح اس نے دیکھا ہے لیکن یہ مجھ سے سبقت لے گیا ہے۔“ [سنن الدارقطني/ كِتَابُ الصَّلَاةِ/حدیث: 937]

عون بن ابوجحیفہ اپنے والد کا یہ بیان نقل کرتے ہیں: سیدنا بلال رضی اللہ عنہ نے نبی کریم صلی اللہ علیہ وسلم کے سامنے اذان دی، جس میں کلمات دو دو مرتبہ کہے پھر اسی طرح اقامت بھی کہی۔ [سنن الدارقطني/ كِتَابُ الصَّلَاةِ/حدیث: 938]

عون بن ابوجحیفہ اپنے والد کے حوالے سے یہ بات بیان کرتے ہیں: سیدنا بلال رضی اللہ عنہ نے نبی کریم صلی اللہ علیہ وسلم کے سامنے اذان دی جس کے کلمات دو مرتبہ تھے۔ اقامت کے کلمات بھی دو مرتبہ تھے۔ ابوعون نامی راوی نے یہ الفاظ نقل کیے ہیں: اذان کے کلمات دو دو مرتبہ، اقامت بھی اس کی مانند تھی۔ [سنن الدارقطني/ كِتَابُ الصَّلَاةِ/حدیث: 939]

ابراہیم نخعی اسود کا یہ بیان نقل کرتے ہیں: سیدنا بلال رضی اللہ عنہ اذان کے کلمات دو دو مرتبہ پڑھتے تھے اور اقامت کے الفاظ دو دو مرتبہ پڑھتے تھے۔ وہ تکبیر کے ذریعے اذان دیا کرتے تھے۔ تکبیر کے ذریعے ہی ختم کرتے تھے۔ [سنن الدارقطني/ كِتَابُ الصَّلَاةِ/حدیث: 940]

سیدنا بلال رضی اللہ عنہ کے بارے میں منقول ہے: ان کی اذان اور ان کی اقامت کے کلمات دو دو مرتبہ ہوتے تھے۔ [سنن الدارقطني/ كِتَابُ الصَّلَاةِ/حدیث: 941]

یہی روایت ایک اور سند کے ہمراہ بھی منقول ہے۔ رمادی کہتے ہیں: سفیان نے اس سے سماع نہیں کیا۔ [سنن الدارقطني/ كِتَابُ الصَّلَاةِ/حدیث: 942]

عبداللہ بن محمد اپنے والد کے حوالے سے اپنے دادا (سیدنا عبداللہ بن زید رضی اللہ عنہ) کا یہ بیان نقل کرتے ہیں: جب انہوں نے خواب میں اذان کا طریقہ دیکھا، تو نبی کریم صلی اللہ علیہ وسلم نے سیدنا بلال رضی اللہ عنہ کو حکم دیا تو انہوں نے اذان دی، پھر نبی کریم صلی اللہ علیہ وسلم نے سیدنا عبداللہ بن زید رضی اللہ عنہ کو حکم دیا انہوں نے اقامت کہی۔ [سنن الدارقطني/ كِتَابُ الصَّلَاةِ/حدیث: 943]

سیدنا انس رضی اللہ عنہ بیان کرتے ہیں: سنت یہ ہے کہ جب مؤذن فجر کی اذان دے تو ”حی علی الفلاح“ کے بعد ”الصلوٰۃ خیر من النوم“ دو مرتبہ کہے اور پھر ”اللہ اکبر اللہ اکبر، لا الہ الا اللہ“ کہہ دے۔ [سنن الدارقطني/ كِتَابُ الصَّلَاةِ/حدیث: 944]

سیدنا انس رضی اللہ عنہ بیان کرتے ہیں: تثویب صبح کی نماز میں ہوتی ہے۔ جب مؤذن فجر کی اذان میں ”حی علی الصلوٰۃ“ اور ”حی علی الفلاح“ کہے گا تو ”الصلوٰۃ خیر من النوم“ کہے گا۔ [سنن الدارقطني/ كِتَابُ الصَّلَاةِ/حدیث: 945]

سیدنا عبداللہ بن عمر رضی اللہ عنہما، سیدنا عمر رضی اللہ عنہ کے بارے میں نقل کرتے ہیں: انہوں نے اپنے مؤذن سے کہا تھا کہ جب تم فجر کی اذان میں ”حی علی الصلوٰۃ“ پر پہنچو تو یہ کہو: ”الصلوٰۃ خیر من النوم، الصلوٰۃ خیر من النوم۔“ [سنن الدارقطني/ كِتَابُ الصَّلَاةِ/حدیث: 946]