ابواسحاق خوارزمی بیان کرتے ہیں: میں نے عاصم احول سے سوال کیا: کیا روزہ دار شخص مسواک کر سکتا ہے؟ انہوں نے جواب دیا: ”جی ہاں!“ میں نے دریافت کیا: تر اور خشک دونوں طرح کی مسواک کر سکتا ہے؟ انہوں نے جواب دیا: ”جی ہاں!“ میں نے سوال کیا: دن کے ابتدائی یا آخری دونوں حصوں میں کر سکتا ہے؟ انہوں نے جواب دیا: ”جی ہاں!“ میں نے دریافت کیا: یہ بات کس سے منقول ہے؟ تو انہوں نے جواب دیا: ”سیدنا انس رضی اللہ عنہ کے حوالے سے نبی کریم صلی اللہ علیہ وسلم سے منقول ہے۔“ اس روایت کا راوی ابواسحاق خوارزمی ضعیف ہے۔ [سنن الدارقطني/ كِتَابُ الصِّيَامِ/حدیث: 2366]

عبداللہ بن عامر بن ربیعہ اپنے والد کے حوالے سے یہ بات نقل کرتے ہیں: ”میں نے نبی کریم صلی اللہ علیہ وسلم کو روزے کی حالت میں مسواک کرتے ہوئے دیکھا ہے۔“ عاصم بن عبیداللہ کے مقابلے میں دیگر راوی زیادہ مستند ہیں۔ [سنن الدارقطني/ كِتَابُ الصِّيَامِ/حدیث: 2367]

عبداللہ بن عامر بن ربیعہ اپنے والد کے حوالے سے نقل کرتے ہیں: ”میں نے نبی کریم صلی اللہ علیہ وسلم کو کئی مرتبہ روزے کی حالت میں مسواک کرتے ہوئے دیکھا ہے۔“ [سنن الدارقطني/ كِتَابُ الصِّيَامِ/حدیث: 2368]

یہی روایت بعض دیگر اسناد کے ہمراہ بھی منقول ہے۔ [سنن الدارقطني/ كِتَابُ الصِّيَامِ/حدیث: 2369]

سیدنا ابوہریرہ رضی اللہ عنہ بیان کرتے ہیں: میں نے نبی کریم صلی اللہ علیہ وسلم کو یہ بات ارشاد فرماتے ہوئے سنا ہے: ”تمہیں عصر کی نماز تک مسواک کرنے کی اجازت ہے، جب تم عصر پڑھ لو، تو پھر اسے ایک طرف رکھ دو، روزہ دار شخص کے منہ کی بو اللہ تعالیٰ کے نزدیک مشک کی خوشبو سے زیادہ پاکیزہ ہے۔“ [سنن الدارقطني/ كِتَابُ الصِّيَامِ/حدیث: 2370]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے ارشاد فرمایا ہے: ”روزہ دار شخص کے لیے سب سے بہترین کام مسواک کرنا ہے۔“ ایک روایت میں یہ الفاظ ہیں: ”روزہ دار شخص کے بہترین کاموں میں سے ایک کام مسواک کرنا ہے۔“ مجالد نامی راوی کے مقابلے میں دیگر راوی زیادہ مستند ہیں۔ [سنن الدارقطني/ كِتَابُ الصِّيَامِ/حدیث: 2371]

سیدنا علی رضی اللہ عنہ ارشاد فرماتے ہیں: ”جب تم روزہ رکھو، تو صبح کے وقت مسواک کرو، شام کے وقت مسواک نہ کرو، اس کی وجہ یہ ہے کہ جس روزہ دار شخص کے ہونٹ شام کے وقت خشک ہوں گے، تو یہ چیز قیامت کے دن اس کے سامنے نور کے طور پر ہو گی۔“ [سنن الدارقطني/ كِتَابُ الصِّيَامِ/حدیث: 2372]

یہی روایت ایک اور سند کے ہمراہ سیدنا خباب رضی اللہ عنہ کے حوالے سے نبی کریم صلی اللہ علیہ وسلم سے منقول ہے۔ ابوعمر کیسان نامی راوی مستند نہیں ہے اور اس کے اور سیدنا علی رضی اللہ عنہ کے درمیان راوی معروف نہیں ہیں۔ [سنن الدارقطني/ كِتَابُ الصِّيَامِ/حدیث: 2373]