سیدنا حذیفہ رضی اللہ عنہ نے فرمایا: ان اصناف کو اس لیے نامزد کیا گیا ہے تاکہ پہچانی جا سکیں، ﴿إِنَّمَا الصَّدَقَاتُ لِلْفُقَرَاءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّقَابِ وَالْغَارِمِينَ وَفِي سَبِيلِ اللَّهِ وَابْنِ السَّبِيلِ﴾، پس ان میں سے جس صنف کو بھی تم دوگے تمہارا فرض ادا ہو جائے گا۔ [سنن سعید بن منصور/كِتَابُ التَّفْسِيرِ/حدیث: 1021]

ابو وائل رحمہ اللہ نے فرمایا: اسے لوٹا کر اس کے اصل مستحقین کو دے دو، میں نے کہا: مؤلفۃ القلوب یعنی جن کے دلوں کو اسلام کی طرف مائل کرنا مقصود ہو کے حصے کا کیا کروں؟ فرمایا: اسے دوسرے مستحقین میں تقسیم کر دو۔ [سنن سعید بن منصور/كِتَابُ التَّفْسِيرِ/حدیث: 1022]

سیدنا عبد اللہ بن مسعود رضی اللہ عنہ ایک شخص کو قرآن پڑھا رہے تھے، اس نے «إِنَّمَا الصَّدَقَاتُ لِلْفُقَرَاءِ وَالْمَسَاكِينِ» مرسلہ پڑھا، تو سیدنا عبد اللہ بن مسعود رضی اللہ عنہ نے فرمایا: رسول اللہ صلی اللہ علیہ وسلم نے مجھے ایسے نہیں پڑھایا! اس شخص نے پوچھا: اے ابو عبد الرحمن! آپ کو کیسے پڑھایا تھا؟ فرمایا: مجھے اس طرح پڑھایا تھا کہ ﴿إِنَّمَا الصَّدَقَاتُ لِلْفُقَرَاءِ وَالْمَسَاكِينِ﴾ اور اسے مد کے ساتھ پڑھا۔ [سنن سعید بن منصور/كِتَابُ التَّفْسِيرِ/حدیث: 1023]

سیدنا عمر بن الخطاب رضی اللہ عنہ نے اللہ عزوجل کے اس فرمان ﴿إِنَّمَا الصَّدَقَاتُ لِلْفُقَرَاءِ وَالْمَسَاكِينِ﴾ کے بارے میں فرمایا: فقراء سے مراد زمانے کے اہل کتاب کے نادار لوگ ہیں۔ [سنن سعید بن منصور/كِتَابُ التَّفْسِيرِ/حدیث: 1024]