سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص اللہ کی راہ میں زخمی ہو اور اللہ خوب جانتا ہے کہ کون اس کی راہ میں زخمی ہوا، وہ قیامت کے دن آئے گا اور اس کا زخم خون بہا رہا ہوگا، خون کا رنگ خون جیسا ہوگا اور خوشبو کستوری کی خوشبو جیسی ہوگی۔“ [سنن سعید بن منصور/كِتَابُ الْجِهَادِ/حدیث: 3748]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص اللہ کی راہ میں زخمی ہو اور اللہ خوب جانتا ہے کہ کون اس کی راہ میں زخمی ہوا، وہ قیامت کے دن آئے گا، اس کا رنگ خون جیسا ہوگا اور خوشبو کستوری کی خوشبو جیسی ہوگی۔“ [سنن سعید بن منصور/كِتَابُ الْجِهَادِ/حدیث: 3749]

سیدنا عمر بن سائب رحمہ اللہ سے روایت ہے کہ انہیں یہ خبر ملی کہ جب رسول اللہ صلی اللہ علیہ وسلم کو احد کے دن زخم لگا تو مالک، سیدنا ابو سعید خدری رضی اللہ عنہ کے والد، آپ کا زخم چوستے رہے یہاں تک کہ خون صاف ہو گیا اور سفیدی ظاہر ہو گئی، لوگوں نے کہا: ”تھوک دو۔“ تو انہوں نے کہا: ”نہیں، اللہ کی قسم! میں اسے کبھی نہیں تھوکوں گا۔“ پھر وہ لڑنے کے لیے لوٹے۔ تو رسول اللہ صلی اللہ علیہ وسلم نے فرمایا: ”جو جنتی آدمی کو دیکھنا چاہے وہ اس کو دیکھ لے۔“ پس وہ شہید ہو گئے۔ [سنن سعید بن منصور/كِتَابُ الْجِهَادِ/حدیث: 3750]