سیدنا اسامہ بن شریک رضی اللہ عنہ بیان کرتے ہیں کہ ہم لوگ نبی اکرم صلی اللہ علیہ وسلم کے پاس موجود تھے، یوں لگتا تھا جیسے ہمارے سروں پر گھونسلے ہیں، ہم میں سے کوئی بھی شخص کلام نہیں کرتا تھا، اس دوران کچھ دیہاتی آپ کی خدمت میں حاضر ہوئے، انہوں نے عرض کی: یا رسول اللہ! آپ ہمیں اس مسئلے کے بارے میں فتویٰ دیجیے، آپ ہمیں اس مسئلے کے بارے میں فتویٰ دیجیے۔ نبی اکرم صلی اللہ علیہ وسلم نے ارشاد فرمایا: ”اے لوگو! اللہ تعالیٰ نے تم سے حرج کو اٹھا لیا ہے، ماسوائے اس شخص کے جو اپنے بھائی کی عزت کو خراب کرنے کی کوشش کرے، یہ وہ شخص ہے جو گناہ کا ارتکاب کرے گا اور ہلاکت کا شکار ہو جائے گا۔“ لوگوں نے عرض کی: یا رسول اللہ! کیا ہم دوا استعمال کر سکتے ہیں؟ نبی اکرم صلی اللہ علیہ وسلم نے فرمایا: ”جی ہاں! اللہ تعالیٰ نے جو بھی بیماری نازل کی ہے اس کے لیے دوا بھی نازل کی ہے، صرف ایک بیماری کا معاملہ مختلف ہے۔“ لوگوں نے عرض کی: یا رسول اللہ! وہ کون سی؟ آپ صلی اللہ علیہ وسلم نے فرمایا: ”بڑھاپا۔“ لوگوں نے عرض کی: یا رسول اللہ! اللہ تعالیٰ کے نزدیک کون شخص زیادہ محبوب ہے؟ نبی اکرم صلی اللہ علیہ وسلم نے فرمایا: ”اللہ تعالیٰ کے نزدیک لوگوں میں زیادہ محبوب وہ شخص ہے جس کے اخلاق اچھے ہوں۔“ [صحیح ابن حبان/كِتَابُ البِرِّ وَالإِحْسَانِ/حدیث: 486]