سیدنا انس بن مالک رضی اللہ عنہ بیان کرتے ہیں: ایک شخص جمعہ کے دن مسجد میں منبر کے سامنے والے دروازے سے داخل ہوا، نبی اکرم صلی اللہ علیہ وسلم اس وقت خطبہ دے رہے تھے وہ شخص آپ کے سامنے آ کر کھڑا ہو گیا۔ اس نے عرض کی: یا رسول الله! مویشی ہلاکت کا شکار ہو رہے ہیں راستے منقطع ہو رہے ہیں۔ آپاللہ تعالیٰ سے دعا کیجئے کہ وہ ہم پر بارش نازل کرے۔ نبی اکرم صلی اللہ علیہ وسلم نے اپنا ہاتھ بلند کیا اور دعا مانگی۔ ”اے اللہ! ہم پر بارش نازل کر۔ اے اللہ! ہم پر بارش نازل کر۔“ سیدنا انس رضی اللہ عنہ بیان کرتے ہیں: خدا کی قسم! ہمیں اس وقت آسمان میں بادل یا بادل کا کوئی ٹکڑا بھی نظر نہیں آ رہا تھا، جو ہمارے اور سلع پہاڑ کے درمیان ہو۔ کسی گھر اور محلے کے اوپر بادل نہیں تھا اسی دوران اس (پہاڑ) کے پیچھے کی طرف سے ڈھال کی طرح کا بادل نمودار ہوا وہ آسمان کے درمیان میں پہنچا، تو پھیلنے لگا اور پھر بارش شروع ہو گئی پھر اللہ کی قسم ہم نے چھ دن تک سورج نہیں دیکھا۔ اگلے جمعے والے دن اس دروازے سے ایک شخص اندر آیا اس وقت نبی اکرم صلی اللہ علیہ وسلم خطبہ دے رہے تھے وہ آپ کے سامنے آ کر کھڑا ہو گیا اس نے عرض کی: یا رسول اللہ! مال مویشی ہلاکت کا شکار ہو رہے ہیں۔ راستے منقطع ہو رہے ہیں آپاللہ تعالیٰ سے دعا کیجئے کہ وہ ہم سے بارش کو روک لے۔ تو نبی اکرم صلی اللہ علیہ وسلم نے اپنے ہاتھ بلند کئے اور دعا مانگی: ”اے اللہ! ہمارے آس پاس (بارش) ہو ہم پر نہ ہو، اے اللہ! پہاڑوں کی چوٹیوں پر کھلے میدانوں میں جنگلات میں بارش ہو۔“ راوی بیان کرتے ہیں، تو بادل چھٹ گیا اور نبی اکرم صلی اللہ علیہ وسلم دھوپ میں چلتے ہوئے باہر تشریف لائے۔ راوی بیان کرتے ہیں: میں نے سیدنا انس رضی اللہ عنہ سے دریافت کیا: کیا یہ پہلے والا شخص تھا؟ انہوں نے جواب دیا: مجھے نہیں معلوم۔ [صحیح ابن حبان/كِتَابُ الرَّقَائِقِ/حدیث: 992]