نزال بن سبرہ بیان کرتے ہیں: میں نے سیدنا علی رضی اللہ عنہ کی اقتداء میں ظہر کی نماز ادا کی پھر وہ اس محفل کی طرف تشریف لے گئے جو وہ کھلے میدان میں منعقد کرتے تھے۔ وہ وہاں تشریف فرما ہوئے ہم ان کے اردگرد بیٹھ گئے یہاں تک کہ عصر کی نماز کا وقت ہو گیا تو ایک برتن لایا گیا جس میں پانی موجود تھا۔ انہوں نے اس میں سے ایک چلو پانی لیا۔ اس سے کلی کی اور ناک میں پانی ڈالا اپنے چہرے اور دونوں بازوؤں پر مسح کیا۔ اپنے سر پر مسح کیا اور دونوں پاؤں پر مسح کر لیا پھر وہ کھڑے ہوئے انہوں نے باقی بچا ہوا پانی پی لیا پھر انہوں نے یہ بات ارشاد فرمائی۔ مجھے یہ بات بتائی گئی ہے کچھ لوگ اس بات کو ناپسند کرتے ہیں کہ ان میں سے کوئی ایک کھڑا ہو کر پانی پیئے جبکہ نبی اکرم صلی اللہ علیہ وسلم کو میں نے ایسا کرتے ہوئے دیکھا ہے، جس طرح میں نے کیا ہے اور یہ اس شخص کا وضو ہے جو بے وضو نہ ہوا ہو (یعنی جس کا سابقہ وضو باقی ہو) [صحیح ابن حبان/كِتَابُ الطَّهَارَةِ/حدیث: 1340]