عبدالملک بن عمیر بنو حارث بن کعب سے تعلق رکھنے والے ایک صاحب، جن کا نام ابواوبر تھا، ان کے حوالے سے نقل کرتے ہیں، وہ بیان کرتے ہیں: میں سیدنا ابوہریرہ رضی اللہ عنہ کے پاس بیٹھا ہوا تھا کہ اسی دوران ایک شخص ان کے پاس آیا اور بولا: کیا آپ نے لوگوں کو جمعہ کے دن روزہ رکھنے سے منع کیا ہے؟ انہوں نے فرمایا: میں نے لوگوں کو جمعہ کے دن روزہ رکھنے سے منع نہیں کیا، بلکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”تم لوگ جمعہ کے دن روزہ نہ رکھو، کیونکہ یہ عید کا دن ہے، البتہ اگر تم اس کے ساتھ کسی دوسرے دن کو ملا لو (تو حکم مختلف ہے)۔“ امام ابن حبان رحمہ اللہ فرماتے ہیں: نبی اکرم صلی اللہ علیہ وسلم کا یہ فرمان «بِأَيَّامٍ» اس سے مراد کوئی ایک دن ہے۔ [صحیح ابن حبان/كِتَابُ الصَّوْمِ/حدیث: 3610]

سیدنا عبداللہ بن عمرو رضی اللہ عنہما بیان کرتے ہیں: نبی اکرم صلی اللہ علیہ وسلم سیدہ جویریہ بنت حارث رضی اللہ عنہا کے ہاں جمعہ کے دن تشریف لائے، انہوں نے روزہ رکھا ہوا تھا، نبی اکرم صلی اللہ علیہ وسلم نے دریافت کیا: ”کیا کل تم نے روزہ رکھا تھا؟“ انہوں نے جواب دیا: جی نہیں، نبی اکرم صلی اللہ علیہ وسلم نے فرمایا: ”کیا کل تمہارا روزہ رکھنے کا ارادہ ہے؟“ انہوں نے عرض کی: جی نہیں، نبی اکرم صلی اللہ علیہ وسلم نے فرمایا: ”پھر روزہ توڑ دو۔“ [صحیح ابن حبان/كِتَابُ الصَّوْمِ/حدیث: 3611]