سیدنا فدیک رضی اللہ عنہ کے بارے میں یہ بات منقول ہے: وہ نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی: یا رسول اللہ صلی اللہ علیہ وسلم ! لوگ یہ کہتے ہیں کہ جو شخص ہجرت نہیں کرتا وہ ہلاکت کا شکار ہو جاتا ہے۔ نبی اکرم صلی اللہ علیہ وسلم نے فرمایا: ”اے فدیک تم نماز ادا کرتے رہو، برائی سے لاتعلق رہو اور جہاں چاہو اپنی قوم کی سرزمین میں رہائش رکھو۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”تم نماز قائم کرو“ یہ فرض حکم ہے جو مخاطب افراد پر بعض حالتوں میں فرض ہوتا ہے تمام حالتوں میں فرض نہیں ہوتا۔ نبی اکرم صلی اللہ علیہ وسلم کا یہ فرمان ”تم برائی سے لاتعلق رہو“ یہ تمام مسلمانوں پر ہر حالت میں فرض ہے تاکہ وہ بھی کسی بھی صورت میں اپنی ذات کے حوالے سے گناہ کا ارتکاب نہ کریں اور کسی دوسرے کے ساتھ کوئی ایسا عمل نہ کریں جس سے اللہ تعالیٰ راضی نہیں ہوتا۔ نبی اکرم صلی اللہ علیہ وسلم کا یہ فرمان ”اور تم اپنی قوم کی سرزمین پر رہائش رکھو جہاں بھی تم چاہو“ یہ مباح قرار دینے کے طور پر حکم ہے لیکن اس سے مراد اطلاع دینا ہے برائی کو ترک کرنے والا وہ شخص جس کی صفت ہم نے بیان کی ہے اس شخص پر کوئی نقصان نہیں ہو گا چاہے وہ کسی بھی جگہ پر رہائش اختیار کرے اگرچہ وہ شرف والے مقامات پر رہائش کو اختیار نہ کرے۔ [صحیح ابن حبان/كِتَابُ السِّيَرِ/حدیث: 4861]