جناب حصین بن عبدالرحمٰن رحمہ اللہ بیان کرتے ہیں کہ عمارہ بن رویبہ رضی اللہ عنہ نے بشر بن مروان کو دیکھا کہ وہ جمعہ کے روز (اثنائے خطبہ میں ہاتھ اٹھا کر) دعا کر رہا تھا (ہاتھ ہلا رہا تھا) تو عمارہ بن رویبہ رضی اللہ عنہ نے کہا: ”اللہ ان دونوں ہاتھوں کو رسوا کرے۔“ زائدہ کہتے ہیں کہ حصین رحمہ اللہ نے کہا: مجھے عمارہ بن رویبہ رضی اللہ عنہ نے بیان کیا: ”تحقیق میں نے رسول اللہ صلی اللہ علیہ وسلم کو دیکھا ہے کہ آپ صلی اللہ علیہ وسلم اس سے زیادہ نہیں کرتے تھے، یعنی صرف شہادت کی انگلی (اٹھانے پہ اکتفا کرتے تھے) جو انگوٹھے سے ملی ہوتی ہے۔“ [سنن ابي داود/تفرح أبواب الجمعة /حدیث: 1104]

سیدنا سہل بن سعد رضی اللہ عنہ بیان کرتے ہیں کہ ”میں نے رسول اللہ صلی اللہ علیہ وسلم کو کبھی نہیں دیکھا کہ آپ صلی اللہ علیہ وسلم نے منبر پر یا اس کے علاوہ دعا کرتے ہوئے اپنے دونوں ہاتھ اٹھائے ہوں۔ میں نے آپ صلی اللہ علیہ وسلم کو دیکھا ہے کہ آپ صلی اللہ علیہ وسلم یوں کرتے تھے“ اور اشارہ کر کے دکھایا کہ آپ صلی اللہ علیہ وسلم انگشت شہادت اٹھاتے اور درمیانی انگلی اور انگوٹھے کا حلقہ بنا لیتے۔ [سنن ابي داود/تفرح أبواب الجمعة /حدیث: 1105]