مسروق بیان کرتے ہیں: میں نے سیدہ ام رومان رضی اللہ عنہا سے دریافت کیا: جو سیدہ عائشہ رضی اللہ عنہا کی والدہ تھیں (راوی کو شک ہے شاید یہ الفاظ ہیں:) اس خاتون سے دریافت کیا گیا: اللہ تعالیٰ نے ان کے یعنی سیدہ عائشہ رضی اللہ عنہا کے بری ذمہ ہونے کے بارے میں کیا نازل کیا، تو سیدہ ام رومان رضی اللہ عنہا نے بتایا: میں عائشہ کے پاس بیٹھی ہوئی تھی اسی دوران ایک انصاری عورت ہمارے پاس آئی وہ یہ کہہ رہی تھی: اللہ تعالیٰ فلاں کے ساتھ اس طرح کرے (یعنی اس کو بددعا دے رہی تھی) تو سیدہ عائشہ رضی اللہ عنہا نے دریافت کیا: تم نے یہ کیوں کہا: ہے، اس نے جواب دیا: اس کی وجہ یہ ہے، اس نے وہ بات کہی ہے۔ سیدہ عائشہ رضی اللہ عنہا نے دریافت کیا: کون سی بات، تو میں نے عائشہ کو اس بارے میں بتایا، اس نے دریافت کیا: کیا نبی اکرم صلی اللہ علیہ وسلم اور سیدنا ابوبکر رضی اللہ عنہ نے یہ بات سنی ہے؟ سیدہ ام رومان رضی اللہ عنہا نے جواب دیا: جی ہاں، تو عائشہ گر پڑی اور اس پر بے ہوشی طاری ہو گئی جب اسے ہوش آیا تو اسے انتہائی تیز بخار تھا۔ سیده ام رومان رضی اللہ عنہا بیان کرتی ہیں نبی اکرم صلی اللہ علیہ وسلم تشریف لائے آپ نے دریافت کیا: اسے کیا ہوا ہے؟ ہم نے عرض کی: اسے بخار ہو گیا ہے۔ نبی اکرم صلی اللہ علیہ وسلم نے فرمایا: شاید یہ اس بات کی وجہ سے ہوا ہے جو اس کے بارے میں کی جا رہی ہے۔ سیدہ ام رومان رضی اللہ عنہا بیان کرتی ہیں، تو عائشہ بیٹھ گئی اس نے کہا: اللہ کی قسم اگر میں قسم اٹھا لوں (کہ میں بری ذمہ ہوں) تو آپ مجھے سچا قرار نہیں دیں گے اور اگر میں بری ذمہ ہونے کا اظہار کروں تو آپ میرا عذر قبول نہیں کریں گے میری اور آپ کی مثال اسی طرح ہے جو سیدنا یعقوب علیہ السلام اور ان کے بیٹوں کی تھی۔ ”اللہ تعالیٰ سے ہی مدد لی جا سکتی ہے اس بارے میں جو تم بیان کر رہے ہو۔“ سیدہ عائشہ رضی اللہ عنہا بیان کرتی ہیں، تو اللہ تعالیٰ نے نبی اکرم صلی اللہ علیہ وسلم پر جو کچھ نازل کرنا تھا نازل کیا، نبی اکرم صلی اللہ علیہ وسلم نے سیدہ عائشہ رضی اللہ عنہا کو اس بارے میں بتایا تو سیدہ عائشہ رضی اللہ عنہا نے کہا: میں اللہ کی حمد بیان کروں گی کسی دوسرے کی حمد بیان نہیں کروں گی۔ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7103]