سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کا وصال میرے گھر میں، میری باری کے مخصوص دن میں، میرے سینے کے ساتھ ٹیک لگائے ہوئے ہوا، (آپ صلی اللہ علیہ وسلم کے وصال سے کچھ دیر پہلے) عبدالرحمن بن ابو بکر رضی اللہ عنہما اندر آئے، ان کے پاس تر مسواک تھی، نبی اکرم صلی اللہ علیہ وسلم نے ان کی طرف دیکھا تو مجھے اندازہ ہو گیا کہ نبی اکرم صلی اللہ علیہ وسلم اسے استعمال کرنا چاہتے ہیں، میں نے اسے لیا، اسے کاٹا، اسے چبایا اور صاف کر لیا، پھر وہ میں نے نبی اکرم صلی اللہ علیہ وسلم کی طرف بڑھائی، آپ صلی اللہ علیہ وسلم نے نہایت اچھے طریقے سے مسواک کی، میں نے آپ صلی اللہ علیہ وسلم کو کبھی اس طرح مسواک کرتے ہوئے نہیں دیکھا، پھر آپ صلی اللہ علیہ وسلم میری طرف (جھکنے لگے تو) وہ آپ صلی اللہ علیہ وسلم کے ہاتھ سے گر گئی، میں نے وہی دعا کرنا شروع کی جو نبی اکرم صلی اللہ علیہ وسلم اس وقت مانگا کرتے تھے جب آپ صلی اللہ علیہ وسلم بیمار ہوتے تھے لیکن آپ صلی اللہ علیہ وسلم نے اپنی اس بیماری کے دوران وہ دعا نہیں مانگی تھی، پھر نبی اکرم صلی اللہ علیہ وسلم نے اپنی نگاہ آسمان کی طرف اٹھائی اور فرمایا: «اللَّهُمَّ الرَّفِيقَ الْأَعْلَىٰ» ”(میں) رفیقِ اعلیٰ کو اختیار کرتا ہوں۔“ یوں آپ صلی اللہ علیہ وسلم کی جان رخصت ہو گئی، ہر طرح کی حمد اللہ تعالیٰ کے لیے مخصوص ہے جس نے نبی اکرم صلی اللہ علیہ وسلم کے دنیا کے آخری دن میں میرے لعابِ دہن اور آپ صلی اللہ علیہ وسلم کے لعابِ دہن کو اکٹھا کر دیا۔ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7116]