”کہ لوگ اسی پر تکیہ نہ کر لیں۔“ (پھر سلیمان اور مسدد دونوں نے کہا) ”قسم اللہ کی! یہ رمضان کی ستائیسویں شب کو ہوتی ہے“، انہوں نے ان شاء اللہ نہ کہا، میں نے کہا: ”اے ابوالمنذر رضی اللہ عنہ! آپ کو اس کا کیسے علم ہوا؟“ انہوں نے کہا: ”اس علامت سے، جو رسول اللہ صلی اللہ علیہ وسلم نے ہمیں بتائی ہے۔“ (عاصم رحمہ اللہ نے کہا) میں نے جناب زر رحمہ اللہ سے پوچھا: ”وہ علامت کیا ہے؟“ انہوں نے کہا: ”اس رات کی صبح کو سورج طشت (تانبے کی بڑی پلیٹ) کی طرح نکلتا ہے اور اونچا ہونے تک اس میں شعاع (اور حدت) نہیں ہوتی۔“ [سنن ابي داود/كتاب تفريع أبواب شهر رمضان /حدیث: 1378]

ضمرہ بن عبداللہ بن انیس اپنے والد (عبداللہ بن انیس رضی اللہ عنہ) سے روایت کرتے ہیں، انہوں نے کہا کہ میں بنی سلمہ کی ایک مجلس میں تھا اور میں ان سب سے چھوٹا تھا، انہوں نے کہا: ”کون ہے جو رسول اللہ صلی اللہ علیہ وسلم سے ہمارے لیے لیلۃ القدر کے متعلق پوچھ آئے؟“ اور یہ رمضان کی اکیسویں تاریخ کی صبح تھی۔ پس میں نکلا اور مغرب کی نماز رسول اللہ صلی اللہ علیہ وسلم کے ساتھ پڑھی، پھر میں آپ صلی اللہ علیہ وسلم کے گھر کے دروازے پر کھڑا ہو گیا۔ آپ صلی اللہ علیہ وسلم میرے پاس سے گزرے تو فرمایا: ”اندر آ جاؤ۔“ میں اندر چلا گیا، آپ صلی اللہ علیہ وسلم کو عشائیہ پیش کیا گیا، مجھے یاد ہے کہ میں کھانا کم ہونے کی وجہ سے جھجھک رہا تھا (یعنی بہت کم کھا رہا تھا)۔ جب فارغ ہو گئے تو فرمایا: ”مجھے میرے جوتے دو۔“ چنانچہ آپ صلی اللہ علیہ وسلم کھڑے ہو گئے اور میں بھی آپ کے ساتھ اٹھ کھڑا ہوا۔ آپ صلی اللہ علیہ وسلم نے فرمایا: ”شاید تم کسی کام سے آئے تھے؟“ میں نے عرض کیا: جی ہاں! مجھے بنی سلمہ کی ایک جماعت نے آپ کی خدمت میں بھیجا ہے، وہ لیلۃ القدر کے متعلق دریافت کرنا چاہتے ہیں۔ آپ صلی اللہ علیہ وسلم نے فرمایا: ”آج کون سی رات ہے؟“ میں نے کہا: بائیسویں، آپ صلی اللہ علیہ وسلم نے فرمایا: ”یہی رات ہے۔“ پھر آپ صلی اللہ علیہ وسلم نے اپنی بات دہرائی اور فرمایا: ”اگلی رات ہے۔“ یعنی تئیسویں رات۔ [سنن ابي داود/كتاب تفريع أبواب شهر رمضان /حدیث: 1379]

سیدنا عبداللہ بن انیس جہنی رضی اللہ عنہ کا بیان ہے کہ میں نے کہا: ”اے اللہ کے رسول! میں دیہات میں رہتا ہوں اور بحمد اللہ وہیں نماز پڑھتا ہوں، تو آپ مجھے کسی رات (لیلۃ القدر) کے متعلق ارشاد فرما دیں کہ اس رات میں یہاں اس مسجد میں آ جاؤں۔“ آپ صلی اللہ علیہ وسلم نے فرمایا: ”تیئیسویں کی رات کو آ جانا۔“ (محمد بن ابراہیم رحمہ اللہ نے کہا) میں نے ان کے بیٹے (ضمرہ بن عبداللہ رحمہ اللہ) سے کہا: ”تو تمہارے والد کیسے کیا کرتے تھے؟“ انہوں نے کہا: ”وہ عصر پڑھ کر مسجد میں داخل ہو جایا کرتے تھے اور کسی حاجت کے لیے باہر نہ نکلتے تھے، حتیٰ کہ صبح کی نماز پڑھتے، پس نمازِ صبح کے بعد اپنی سواری مسجد کے دروازے پر پاتے تھے، اس پر بیٹھتے اور اپنی منزل پر (دیہات میں) چلے آتے۔“ [سنن ابي داود/كتاب تفريع أبواب شهر رمضان /حدیث: 1380]

سیدنا ابن عباس رضی اللہ عنہما، نبی کریم صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”لیلۃ القدر کو رمضان کی آخری دس (راتوں) میں تلاش کرو۔ آخری نویں، ساتویں اور پانچویں رات میں۔“ [سنن ابي داود/كتاب تفريع أبواب شهر رمضان /حدیث: 1381]