سیدنا محمد بن منکدر سے روایت ہے کہ سیدنا عبداللہ بن عباس اور سیدنا عبداللہ بن عمرو بن عاص رضی اللہ عنہم کی ملاقات ہوئی، تو ابن عباس نے ان سے پوچھا: آپ کے نزدیک کتاب اللہ کی سب سے زیادہ امید افزا آیت کون سی ہے؟ عبداللہ بن عمرو نے کہا: ﴿يَاعِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ﴾ ”اے میرے وہ بندو جنہوں نے اپنی جانوں پر زیادتی کی ہے، اللہ کی رحمت سے مایوس نہ ہو“ [الزمر: 53] ، تو ابن عباس نے فرمایا: لیکن میرے نزدیک (سب سے زیادہ امید افزا) حضرت ابراہیم علیہ السلام کا یہ قول ہے: ﴿رَبِّ أَرِنِي كَيْفَ تُحْيِ الْمَوْتَى قَالَ أَوَلَمْ تُؤْمِنْ قَالَ بَلَى وَلَكِنْ لِيَطْمَئِنَّ قَلْبِي﴾ ”اے میرے رب! مجھے دکھا کہ تو مردوں کو کیسے زندہ کرتا ہے؟ فرمایا: کیا تجھے یقین نہیں؟ عرض کیا: کیوں نہیں! لیکن اس لیے (پوچھ رہا ہوں) تاکہ میرے دل کو اطمینان ہو جائے“ [البقرة: 260] ، پس اللہ تعالیٰ نے ابراہیم علیہ السلام کے جواب «بَلَى» (کیوں نہیں!) کو پسند فرمایا (اور یہ ان وسوسوں کا علاج ہے جو شیطان دلوں میں ڈالتا ہے)۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ الْإِيمَانِ/حدیث: 199]