سیدنا شکل بن حمید رضی اللہ عنہ فرماتے ہیں: میں نے رسول اللہ صلی اللہ علیہ وسلم کی بارگاہ میں حاضر ہو کر عرض کی: مجھے تعوذ سکھائیے تاکہ اس کے ساتھ میں پناہ مانگا کرو۔ آپ صلی اللہ علیہ وسلم نے میرا ہاتھ پکڑا اور فرمایا: یوں کہو: ” اللّٰھمّ انّی اعوذبک من شرِّ سمعی، ومن شر بصری، ومن شر نفسی، ومن شر منیِّی۔ ” اے اللہ! میں اپنی سماعت، اپنی بصارت اپنے نفس اور اپنی موت کے شر سے تیری پناہ مانگتا ہوں۔ (آپ صلی اللہ علیہ وسلم یہ دعا مسلسل دہراتے رہے) حتی کہ ان کو یہ دعا یاد ہو گئی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1974]

سیدنا مسلم بن بکرہ رضی اللہ عنہ فرماتے ہیں: ایک مرتبہ میرے والد نے مجھے یہ دعا مانگتے سُنا: ” اللّٰھمّ انی اعوذبک من الھمِّ والکسل، وعذاب القبر۔ “ ” اے اللہ! میں غم، کاہلی اور عذابِ قبر سے تیری پناہ مانگتا ہوں۔ “ تو وہ مجھ سے کہنے لگے: اے میرے بیٹے! تم نے یہ دعا کس سے سنی ہے؟ میں نے کہا: میں نے یہ آپ ہی سے سنی ہے۔ انہوں نے فرمایا: اس دعا کو ہمیشہ مانگتے رہنا، کیونکہ میں نے رسول اللہ صلی اللہ علیہ وسلم کو یہ دعا مانگتے سنا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1975]

سیدنا ابوہریرہ رضی اللہ عنہ فرماتے ہیں: رسول اللہ صلی اللہ علیہ وسلم یہ دعا مانگا کرتے تھے: ” اعوذبک من عذاب جھنّم، وعذاب القبر، وفتنۃ المحیا، وفتنۃ الممات، وفتنۃ الدجّال۔ (اے اللہ) میں عذابِ جہنم، عذابِ قبر، زندگی اور موت کے فتنہ اور فتنہ دجال سے تیری پناہ مانگتا ہوں۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1976]