سیدنا ابوہریرہ رضی اللہ عنہ سے روایت ہے کہ سیدنا ابی بن کعب رضی اللہ عنہ نے کہا کہ رسول اللہ صلی اللہ علیہ وسلم نے فرمایا: ”کیا میں تمہیں ایسی سورت نہ سکھاؤں جس کی مثل نہ تورات میں ہے، نہ انجیل میں، نہ زبور میں اور نہ ہی (بقیہ) قرآن میں؟“ میں نے عرض کیا: کیوں نہیں، آپ صلی اللہ علیہ وسلم نے فرمایا: ”مجھے امید ہے کہ تم اس دروازے سے نکلنے سے پہلے اسے سیکھ لو گے“، رسول اللہ صلی اللہ علیہ وسلم کھڑے ہوئے اور میں بھی آپ کے ساتھ کھڑا ہو گیا، آپ صلی اللہ علیہ وسلم میرا ہاتھ اپنے ہاتھ میں لیے مجھ سے باتیں کرنے لگے، میں (سورت سیکھنے کے شوق میں) جان بوجھ کر سست رفتاری سے چلنے لگا کہ کہیں آپ صلی اللہ علیہ وسلم مجھے وہ سورت بتانے سے پہلے باہر نہ نکل جائیں، جب میں دروازے کے قریب پہنچا تو عرض کیا: اے اللہ کے رسول! وہ سورت جس کا آپ نے مجھ سے وعدہ کیا تھا؟ آپ صلی اللہ علیہ وسلم نے فرمایا: ”جب تم نماز کے لیے کھڑے ہوتے ہو تو کیا پڑھتے ہو؟“ میں نے فاتحہ الکتاب پڑھی، آپ صلی اللہ علیہ وسلم نے فرمایا: ”یہی وہ سورت ہے، اور یہی وہ سبع مثانی ہے جس کے بارے میں اللہ عزوجل نے فرمایا ہے: ﴿وَلَقَدْ آتَيْنَاكَ سَبْعًا مِنَ الْمَثَانِي وَالْقُرْآنَ الْعَظِيمَ﴾ ”یقیناً ہم نے آپ کو سات بار بار دہرائی جانے والی آیات اور عظمت والا قرآن عطا فرمایا ہے“ [سورة الحجر: 87] ، جو مجھے دی گئی ہے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا، اور اس کی روایت میں علاء بن عبدالرحمن پر اختلاف کیا گیا ہے۔ [المستدرك على الصحيحين/كِتَابُ فَضَائِلِ الْقُرْآنِ/حدیث: 2071]

سیدنا ابی بن کعب رضی اللہ عنہ سے روایت ہے کہ رسول اللہ صلی اللہ علیہ وسلم نے انہیں اس وقت پکارا جب وہ نماز پڑھ رہے تھے، جب وہ نماز سے فارغ ہوئے تو آپ صلی اللہ علیہ وسلم سے جا ملے، راوی کہتے ہیں: نبی کریم صلی اللہ علیہ وسلم نے اپنا ہاتھ میرے ہاتھ پر رکھا جبکہ آپ مسجد کے دروازے سے باہر نکلنا چاہتے تھے، آپ صلی اللہ علیہ وسلم نے فرمایا: ”مجھے امید ہے کہ تم مسجد سے باہر نہیں نکلو گے یہاں تک کہ تم وہ سورت سیکھ لو جس کی مثل نہ تورات میں نازل ہوئی، نہ انجیل میں اور نہ ہی قرآن میں“، میں (سورت سیکھنے کی) امید میں سستی سے چلنے لگا، پھر میں نے عرض کیا: اے اللہ کے رسول! وہ سورت جس کا آپ نے مجھ سے وعدہ فرمایا تھا؟ آپ صلی اللہ علیہ وسلم نے فرمایا: ”جب تم نماز شروع کرتے ہو تو کیا پڑھتے ہو؟“ میں نے ﴿الْحَمْدُ لِلَّهِ رَبِّ الْعَالَمِينَ﴾ آخر تک پڑھی، تو رسول اللہ صلی اللہ علیہ وسلم نے فرمایا: ”یہ وہی سورت ہے، اور یہی سبع مثانی اور وہ قرآنِ عظیم ہے جو مجھے عطا کیا گیا ہے۔“ [سورة الحجر: 87] [المستدرك على الصحيحين/كِتَابُ فَضَائِلِ الْقُرْآنِ/حدیث: 2072]

سیدنا ابی بن کعب رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کے سامنے ﴿الْحَمْدُ لِلَّهِ رَبِّ الْعَالَمِينَ﴾ مکمل تلاوت کی، تو رسول اللہ صلی اللہ علیہ وسلم نے فرمایا: ”یقیناً یہ سبع مثانی اور وہ قرآنِ عظیم ہے جو مجھے عطا کیا گیا ہے۔“ [سورة الحجر: 87] [المستدرك على الصحيحين/كِتَابُ فَضَائِلِ الْقُرْآنِ/حدیث: 2073]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے سیدنا ابی بن کعب رضی اللہ عنہ کو پکارا جب وہ کھڑے نماز پڑھ رہے تھے، انہوں نے جواب نہ دیا، آپ صلی اللہ علیہ وسلم نے فرمایا: ”اے ابی! تمہیں میرا جواب دینے سے کس چیز نے روکا؟“ انہوں نے عرض کیا: میں نماز پڑھ رہا تھا، آپ صلی اللہ علیہ وسلم نے فرمایا: ”کیا اللہ تبارک و تعالیٰ نے یہ نہیں فرمایا: ﴿اسْتَجِيبُوا لِلَّهِ وَلِلرَّسُولِ إِذَا دَعَاكُمْ﴾ ”اللہ اور اس کے رسول کی پکار پر لبیک کہو جب وہ تمہیں بلائیں“ [سورة الأنفال: 24] ، تم مسجد سے اس وقت تک باہر نہ جانا جب تک میں تمہیں ایسی سورت نہ سکھا دوں جس کی مثل اللہ نے تورات، انجیل اور زبور میں نازل نہیں فرمائی“، ابی کہتے ہیں: پھر آپ صلی اللہ علیہ وسلم نے میرے ہاتھ کا سہارا لیا یہاں تک کہ جب آپ مسجد کے آخری کنارے پر پہنچے تو میں نے عرض کیا: اے اللہ کے نبی! آپ نے ایسا ایسا فرمایا تھا، آپ صلی اللہ علیہ وسلم نے فرمایا: ”ہاں، یہ ام القرآن ہے، اس ذات کی قسم جس کے قبضے میں میری جان ہے! اللہ نے اس جیسی سورت تورات، انجیل اور زبور میں نازل نہیں فرمائی، اور یہی وہ سات لمبی سورتیں (کے قائم مقام) ہے جو مجھے دی گئی ہیں، اور یہی قرآنِ عظیم ہے۔“ [سورة الحجر: 87] [المستدرك على الصحيحين/كِتَابُ فَضَائِلِ الْقُرْآنِ/حدیث: 2074]