”ہمیں یہ حدیث ابو سعید احمد بن یعقوب الثقفی نے بیان کی، وہ کہتے ہیں کہ ہمیں عبداللہ بن عبد الرحمن بن عبداللہ الدشتکی نے بیان کی، وہ کہتے ہیں کہ ہمیں میرے والد نے بیان کی، وہ کہتے ہیں کہ ہمیں عمرو بن ابی قیس نے عاصم کے واسطے سے، انہوں نے ابوالاحوص سے، اور انہوں نے سیدنا عبداللہ (بن مسعود) رضی اللہ عنہ سے، اور انہوں نے نبی کریم صلی اللہ علیہ وسلم سے اسی طرح (پچھلی حدیث کے ہم معنی) روایت کی ہے۔ یہ حدیث صحیح الاسناد ہے (یعنی اس کی سند صحیح ہے) لیکن امام بخاری اور امام مسلم نے اسے اپنی صحیحین میں نقل نہیں فرمایا۔“ [المستدرك على الصحيحين/كِتَابُ فَضَائِلِ الْقُرْآنِ/حدیث: 2107]

سیدنا (عبداللہ) ابن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: کیا تم میں سے کوئی شخص روزانہ ایک ہزار آیتیں تلاوت کرنے کی استطاعت نہیں رکھتا؟ صحابہ کرام رضی اللہ عنہم نے عرض کی: اور کون اس کی استطاعت رکھتا ہے؟ (یعنی کوئی بھی اس کی استطاعت نہیں رکھتا) تو آپ صلی اللہ علیہ وسلم نے فرمایا: کیا تم میں سے کوئی اَلْھٰکُمُ التَّکَاثُرُ پڑھنے کی استطاعت نہیں رکھتا؟ ٭٭ اس حدیث کے تمام راوی ثقہ ہیں اور یہ عقبہ غیر مشہور ہیں۔ [المستدرك على الصحيحين/كِتَابُ فَضَائِلِ الْقُرْآنِ/حدیث: 2108]