سیدنا انس بن مالک رضی اللہ عنہ بیان کرتے ہیں کہ ”میں نے رسول اللہ صلی اللہ علیہ وسلم کو سنا کہ آپ صلی اللہ علیہ وسلم حج اور عمرے کا تلبیہ اکٹھے پڑھتے ہوئے کہہ رہے تھے: «لَبَّيْكَ عُمْرَةً وَحَجًّا، لَبَّيْكَ عُمْرَةً وَحَجًّا» ”میں حاضر ہوں عمرے اور حج کے لیے، میں حاضر ہوں عمرے اور حج کے لیے۔““ [سنن ابي داود/كِتَاب الْمَنَاسِكِ/حدیث: 1795]

سیدنا انس رضی اللہ عنہ کا بیان ہے کہ نبی کریم صلی اللہ علیہ وسلم نے ذوالحلیفہ کے مقام پر رات گزاری حتیٰ کہ صبح ہو گئی۔ پھر آپ صلی اللہ علیہ وسلم (ظہر کے بعد) اپنی سواری پر سوار ہوئے حتیٰ کہ جب وہ آپ صلی اللہ علیہ وسلم کو لے کر میدان بیداء میں سیدھی کھڑی ہوئی تو آپ صلی اللہ علیہ وسلم نے اللہ کی حمد، تسبیح اور تکبیر پکاری۔ پھر حج اور عمرے کا تلبیہ کہا اور لوگوں نے بھی ان دونوں کا تلبیہ کہا۔ پھر جب ہم مکہ پہنچے تو آپ صلی اللہ علیہ وسلم نے لوگوں کو حکم دیا تو وہ حلال ہو گئے (ان لوگوں کو جن کے پاس قربانیاں نہیں تھیں) حتیٰ کہ جب آٹھویں تاریخ آئی تو انہوں نے حج کا احرام باندھا اور رسول اللہ صلی اللہ علیہ وسلم نے اپنے ہاتھ سے سات اونٹنیاں نحر کیں، اس حال میں کہ وہ کھڑی ہوئی تھیں۔ امام ابوداؤد رحمہ اللہ فرماتے ہیں کہ ”سیدنا انس رضی اللہ عنہ اس روایت میں اس بات میں منفرد ہیں کہ انہوں نے اللہ کی حمد، تسبیح اور تکبیر کہی، پھر حج کا تلبیہ کہا۔“ [سنن ابي داود/كِتَاب الْمَنَاسِكِ/حدیث: 1796]

سیدنا براء بن عازب رضی اللہ عنہ بیان کرتے ہیں کہ رسول اللہ صلی اللہ علیہ وسلم نے سیدنا علی رضی اللہ عنہ کو جب یمن کا والی بنا کر بھیجا تو میں ان کے ساتھ تھا۔ اس خدمت کے صلے میں مجھے چند اوقیہ (سونا) بھی ملا تھا۔ سیدنا علی رضی اللہ عنہ جب یمن سے واپسی کے بعد رسول اللہ صلی اللہ علیہ وسلم سے ملے تو وہ کہتے ہیں کہ میں نے فاطمہ رضی اللہ عنہا کو پایا کہ انہوں نے رنگین کپڑے پہنے ہیں اور اپنی منزل کو بھی انہوں نے معطر کر رکھا ہے۔ (سیدنا علی رضی اللہ عنہ کو تعجب ہوا) تو وہ بولیں: ”آپ حیران کیوں ہیں؟ رسول اللہ صلی اللہ علیہ وسلم نے اپنے اصحاب کو حکم دیا ہے اور وہ حلال ہو گئے ہیں۔“ وہ کہتے ہیں کہ میں نے فاطمہ رضی اللہ عنہا سے کہا: ”میں نے نبی کریم صلی اللہ علیہ وسلم والے احرام کی نیت کر رکھی ہے۔“ کہتے ہیں، چنانچہ میں نبی کریم صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے پوچھا: ”تم نے (نیت) کیسے کی ہے؟“ میں نے کہا: ”میں نے نبی کریم صلی اللہ علیہ وسلم کے احرام والی نیت کی ہے۔“ آپ صلی اللہ علیہ وسلم نے فرمایا: ”میں اپنی قربانی ساتھ لایا ہوں اور قران کی نیت کی ہے۔“ وہ بیان کرتے ہیں کہ پھر آپ صلی اللہ علیہ وسلم نے مجھے حکم فرمایا: ”سڑسٹھ یا چھیاسٹھ اونٹ نحر کرو اور تینتیس یا چونتیس اونٹ اپنے لیے لے لو اور ہر قربانی میں سے گوشت کا ایک ایک ٹکڑا میرے لیے لاؤ۔“ [سنن ابي داود/كِتَاب الْمَنَاسِكِ/حدیث: 1797]

ابووائل بیان کرتے ہیں کہ سیدنا صبی بن معبد رضی اللہ عنہ نے کہا: ”میں نے حج اور عمرے دونوں کا اکٹھے ہی تلبیہ کہا ہے“، تو سیدنا عمر بن خطاب رضی اللہ عنہ نے کہا: ”تمہیں اپنے نبی کریم صلی اللہ علیہ وسلم کے طریقے کی ہدایت ملی ہے۔“ [سنن ابي داود/كِتَاب الْمَنَاسِكِ/حدیث: 1798]

ابووائل کہتے ہیں کہ صبی بن معبد نے کہا: ”میں ایک بدوی نصرانی آدمی تھا، مسلمان ہو گیا۔ پھر میں اپنے قبیلے کے ایک آدمی کے پاس آیا جس کا نام ہدیم بن ثرملہ تھا۔ میں نے اس سے کہا: ارے میاں! میں جہاد کا حریص ہوں مگر حج اور عمرہ بھی مجھ پر لازم ہو چکے ہیں تو اگر میں ان دونوں (حج اور عمرے) کو جمع کر لوں تو کیسا رہے گا؟ اس نے کہا: ان دونوں کو جمع کر لو اور جو میسر ہو قربانی کر لو۔ چنانچہ میں نے ان دونوں کی نیت سے تلبیہ کہا (اور احرام باندھا)۔ جب میں عذیب مقام پر پہنچا تو مجھے سلمان بن ربیعہ اور زید بن صوحان ملے اور میں حج اور عمرے دونوں کا تلبیہ پکار رہا تھا۔ تو ان میں سے ایک نے دوسرے سے کہا: یہ اپنے اونٹ سے زیادہ سمجھ دار نہیں ہے! (بیوقوف ہے کہ حج اور عمرے کا اکٹھے تلبیہ پکار رہا ہے)۔“ صبی بیان کرتے ہیں کہ ان کی اس بات سے گویا مجھ پر پہاڑ ٹوٹ پڑا، حتیٰ کہ میں سیدنا عمر بن خطاب رضی اللہ عنہ کے پاس آیا اور ان سے کہا: ”اے امیر المؤمنین! میں ایک بدوی نصرانی آدمی تھا اور مسلمان ہو گیا ہوں، جہاد پر جانے کا حریص ہوں مگر میں نے دیکھا کہ حج اور عمرہ بھی مجھ پر واجب ہو چکا ہے تو میں قوم کے ایک آدمی کے پاس آیا، اس نے مجھے کہا کہ حج اور عمرے کو اکٹھا کر لو اور جو میسر ہو قربانی کر لو۔ چنانچہ میں نے ان دونوں کا اکٹھے تلبیہ پکارا ہے۔“ تو سیدنا عمر رضی اللہ عنہ نے مجھے فرمایا: ”تمہیں تمہارے نبی کریم صلی اللہ علیہ وسلم کے طریقے کی ہدایت ملی ہے۔“ [سنن ابي داود/كِتَاب الْمَنَاسِكِ/حدیث: 1799]

سیدنا ابن عباس رضی اللہ عنہ بیان کرتے ہیں کہ سیدنا عمر بن خطاب رضی اللہ عنہ نے مجھ سے بیان کیا کہ انہوں نے رسول اللہ صلی اللہ علیہ وسلم سے سنا جبکہ آپ وادی عقیق میں تھے، آپ فرما رہے تھے: ”آج رات میرے پاس میرے رب عزوجل کی طرف سے ایک آنے والا آیا اور اس نے کہا ہے: اس مبارک وادی میں نماز پڑھو اور اس نے کہا کہ عمرہ حج میں داخل ہے۔“ امام ابوداؤد رحمہ اللہ فرماتے ہیں کہ اس روایت کو ولید بن مسلم اور عمر بن عبدالواحد نے اوزاعی سے بیان کیا تو صرف اسی قدر کہا: «وَقُلْ عُمْرَةً فِي حِجَّةٍ» ”اور کہہ دو کہ عمرہ حج میں داخل ہے۔“ اور لفظ «قَالَ» کی بجائے «وَقُلْ» کہا۔ امام ابوداؤد رحمہ اللہ فرماتے ہیں کہ ایسے ہی علی بن مبارک نے یحییٰ بن ابی کثیر سے (بصیغہ امر) «قُلْ عُمْرَةً فِي حِجَّةٍ» ”کہہ دو کہ عمرہ حج میں داخل ہے۔“ بیان کیا ہے۔ [سنن ابي داود/كِتَاب الْمَنَاسِكِ/حدیث: 1800]

جناب ربیع بن سبرہ اپنے والد رضی اللہ عنہ سے بیان کرتے ہیں کہ ہم رسول اللہ صلی اللہ علیہ وسلم کے ساتھ روانہ ہوئے حتیٰ کہ جب ہم مقام عسفان میں تھے تو سراقہ بن مالک مدلجی رضی اللہ عنہ نے آپ صلی اللہ علیہ وسلم سے کہا: ”اے اللہ کے رسول! ہمیں خوب واضح فرما دیجیے اور ہمیں ایسی قوم سمجھیے جو گویا آج ہی پیدا ہوئے ہوں۔“ آپ صلی اللہ علیہ وسلم نے فرمایا: ”بلاشبہ اللہ تعالیٰ نے تمہارے اس حج میں عمرے کو داخل کر دیا ہے، سو جب تم مکہ پہنچو تو جس نے بیت اللہ کا طواف اور صفا مروہ کی سعی کر لی، پس وہ حلال ہو گیا الا یہ کہ اس کے ساتھ قربانی ہو۔“ [سنن ابي داود/كِتَاب الْمَنَاسِكِ/حدیث: 1801]

سیدنا ابن عباس رضی اللہ عنہما بیان کرتے ہیں کہ سیدنا معاویہ رضی اللہ عنہ نے انہیں بتایا کہ ”میں نے مروہ پر ایک تیر کے پھل سے نبی کریم صلی اللہ علیہ وسلم کے بال کاٹے تھے یا میں نے دیکھا کہ مروہ پر تیر کے پھل سے آپ صلی اللہ علیہ وسلم کے بال کاٹے گئے۔“ ابوبکر بن خلاد نے «أَخْبَرَهُ» کا لفظ استعمال نہیں کیا (بلکہ یوں کہا) «إِنَّ مُعَاوِيَةَ بْنَ أَبِي سُفْيَانَ...» ۔ [سنن ابي داود/كِتَاب الْمَنَاسِكِ/حدیث: 1802]

سیدنا ابن عباس رضی اللہ عنہما بیان کرتے ہیں کہ سیدنا معاویہ رضی اللہ عنہ نے ان سے کہا: ”کیا تمہیں معلوم نہیں کہ میں نے مروہ پر ایک بدوی کے تیر (کے پھل) سے رسول اللہ صلی اللہ علیہ وسلم کے بال کاٹے تھے؟“ حسن بن علی کی روایت میں اضافہ ہے: ”حج کے موقع پر۔“ [سنن ابي داود/كِتَاب الْمَنَاسِكِ/حدیث: 1803]

سیدنا ابن عباس رضی اللہ عنہما بیان کرتے ہیں کہ ”نبی کریم صلی اللہ علیہ وسلم نے عمرے کا تلبیہ پکارا اور آپ صلی اللہ علیہ وسلم کے اصحاب نے حج کا۔“ [سنن ابي داود/كِتَاب الْمَنَاسِكِ/حدیث: 1804]